香港人不時都會自嘲香港是「投訴之都」,除了商店會收到投訴,機內也不時會有各種稀奇古怪的投訴。當然,自己行得正企得正,的確不怕乘客投訴。不過有時候部分投訴的原因,「當堂嚇一跳,然後得啖笑」令人心裡不禁覺得到底有什麼是不可以投訴?

港男:「我要投訴你哋唔delay!」

大家要知道飛中國內地嘅航班,經常因為「空管」問題而會引致延誤,少則一粒鐘,發功起上嚟,真係遲足半日有多,所以經常往返兩地嘅乘客對延誤都見怪不怪。不過講真話,小弟飛咗幾年,每次飛北京上海,都冇試過delay 之餘,仲一定早到,就算香港遲出發,都一定係香港呢邊機場繁忙累事。

今日又照舊飛北京,回程準時出發,加上飛行時間短,所以預計我哋最少會早四十分鐘飛到返香港。正當大家好開心可以早收工返屋企食飯之際,點知有人「叮」我哋喎!

我:「哈囉,先生有冇乜嘢幫到你?」

香港男士:「做咩咁早走得?」

我:「嗯,我估今日機場唔忙,所以準時出發。」

投訴之都
(圖片來源:GOtrip編輯部)

香港男士:「次次都遲,今日又唔遲,我等緊電話開conference call呀!」

我:「嗯,明白,但我哋真係冇辦法delay 。」

香港男士:「我要投訴你哋唔delay,畀張意見表我。」

我:「好嘅,我畀張表你。」 (先生你冇事吖嘛?)

香港男士:「仲有呀,你哋依家咁早起飛,然後又飛得咁快,咁咪好早到香港?」

我:「係嘅,暫定早四十分鐘返到香港。」

香港男士:「有冇搞錯,咁早到嘅話,咁就係我等司機囉!」

我:「。。。」

投訴之都
(圖片來源:GOtrip編輯部)

香港人連準時起飛都要投訴⋯⋯

聽到呢度,我對眼反咗上太空落唔返嚟,並且對於香港人連準時起飛都要投訴覺得好可悲,試諗下,如果呢位先生要傾呢個咁重要嘅電話的話,點解唔選擇坐遲一班機呢?然後斷估佢個司機都唔會冇腦唔睇定要幾點機飛到香港啩!所以我真係極度懷疑投訴嘅動機,因此,嗱嗱聲隊阿姐出去會下呢位哥仔。

阿姐:「先生,呢份係意見表,我係負責經濟艙嘅。」

香港男士:「你哋依家做錯嘢,有冇咩賠償?」

阿姐:「如果你有買保險的話,我估你可以同你嘅保險公司傾下航班早到有冇得賠。」

香港男士:「你哋依家做錯嘢都唔upgrade我去商務艙?我係你哋銀卡會員,你哋咁樣對你嘅會員?」

阿姐:「明白先生嘅要求,不過,如果免費upgrade係由地勤安排,但今日經濟艙有五十幾個鑽石卡同四十幾個金卡會員,或者你可以向公司反映下個升艙嘅政策,thank you。」

投訴之都
(圖片來源:GOtrip編輯部)

到底為咗可以免費升艙,人可以去到幾盡?
而想免費升艙嘅朋友,通常我哋升艙嘅,都係畀我哋嘅常客會員,由 鑽石卡 到 金卡 再到 銀卡 然後係 綠卡,特別係好多高級會員嘅航班,相對升艙嘅機會就會細啲喇!

投訴之都
(圖片來源:Facebook@Cathay Pacific 國泰航空)

圖片來源:GOtrip編輯部