中大學者李兆波遊日食壽司稱「細件咗」 網民：定係你個口大咗？
日本重新開關，不少港人已急不及待出發旅行，揚言要到黑門市場「食返餐勁」。而中大學者李兆波早前接受其他傳媒訪問時亦透露已在開放自由行前率先出發日本，到大阪旅行。當中提及到自己每次去都會光顧一間比壽司郎質素更好的迴轉壽司店，闊別兩年多再到訪仍保持到水準，惟「好似細件咗」；又指當地沒有旅客到訪一段時間，「英文都差咗」。
網民推薦大嚿飯壽司餐廳：元朗「田中」無得輸
網民看到評論後指「話日本壽司細件咗會唔會太好笑」，稱「日本壽司嚿飯不嬲都細件㗎啦，要食大嚿飯你留喺香港去田中到食咪得」，更有網民留言回應指「田中堅係食飯，唔係壽司」、「可以用碟頭飯嚟形容，實啱佢食，唔好蹝錢去日本啦」。
百佳壽司有得揮
除了元朗「田中」外，網民亦力推百佳壽司，指「嗰嚿飯就真係夠晒大件，重量十足啦」、「又平又大件，啱晒佢要求」、「爭鮮嚿飯都唔夠百佳飽」。
網民：將香港Style套落日本到？
亦有網民指「笑死，究竟係件壽司細件咗，定係你個口大咗？」、「要食大嚿其實你食飯糰咪得」、「以為食緊三餸飯白飯任裝？」、「佢食慣香港啲大嚿壽司，將嗰套放咗喺日本身上，又唔入鄉隨俗啦」、「喺日本話保持到日本壽司水準，係咩概念？」
