前空少爆國泰疑似請臨記出席招聘會　網民指非首次上鏡　國泰澄清非事實

國泰被前空少炮轟：點解年輕我就要接受HK$9,000買夢？

前日（10月8日）曾於國泰任職空少的Andrew於自家Facebook page「安德魯，飛邊？」發文，大爆國泰疑似聘請臨時演員（臨記）出席幾日前的招聘會。他表示當年他也因為「賣夢」而加入國泰成為空少，但當時的人工並不止港幣9,000元，他力批「點解年輕我就要接受HK$9,000買夢？」：

係HK$9,000喎大佬，
你有屋企人養你就HK$9,000乜都得，
自己自食其力搬出嚟嘅人，HK$9,000點生活？
仲有點解要班一早入咗嚟嘅員工陪班年輕人一齊買夢？
人地入咗嚟20幾30年，減人工一齊買夢？
咩邏輯？

而他亦指出，他反諷地指「你依家入間公司，你接受HK$9,000人工，你apply，我佩服」，同時亦怒批國泰改舊員工的合約，減舊員工的人工，直指國泰無合約精神。另外他也指出，他當時的薪水並不是國泰聲稱的「最高HK$17,000」，而是每個月最少有港幣16,000元以上。

國泰前空少Andrew大爆「陳同學」實為臨記：好過你做過咁多ViuTV嘅劇啦！

不過他話鋒一轉指出，他有個PR朋友send了張comp card給他，直指幾日前國泰招聘會上受訪、自稱現時就讀香港國際航空學院航空管理高級文憑的20歲陳同學其實是一位臨記。而他也親切地為大家解釋什麼是comp card：

Comp card係一啲model，或者係演員會send俾啲PR公司or客去介紹自己嘅卡，
陳同學你今次得到你嘅演出機會啦！
好過你做過咁多ViuTV嘅劇啦！

網民齊恥笑國泰疑似請臨記的行為：請老臨拍《衝上雲霄3》？

前空少Andrew的爆料引起大批網民熱議，不少網民都恥笑國泰疑似請臨記充撐招聘會的行為：「國泰做得好L肉酸」、「與時代進步咗，識俾錢請人充場充人氣」、「請咁多老臨，拍緊《衝上雲霄3》嗎？」、「霞姨穿煲呀，收返個飯盒啦」、「冇得假，條呔都係斜同一邊」、「世界十大航空公司要揾演員……」、「陳同學係訪問內提及係做舞台劇演員，所以有做特約係正常」。亦有其他國泰前空少留言：「公司資源幾充足喎，仲請得起臨記 #臨時演員都係演員」，而Andrew亦回覆到：「將啲錢用去唔應該用嘅地方，如果唔係點會攪到依家咁」。

不過亦有網民指出臨記亦可以到國泰招聘會面試，做臨記與考空少兩件事並沒有必然的關係：「話唔定做開臨記想轉行做空少呢」、「做臨記唔可以考空少？兩者有必然關係？有冇直接證據證明到佢係國泰請去嘅臨記先？」、「咁做臨記再追夢轉行，又好似無乜衝突，不過9k俾狗做」、「咁9k真係穩定過臨記」。

眼利網民發現陳同學並非首次上鏡！

同時有眼利網民認出，陳同學正是周星馳遭前女友于文鳳追收7,000萬投資分紅案續審時，在法庭外索取簽名的星爺粉絲「Bosco」！當時他被星爺即場問書，「《長江七號》第一句對白係咩？」，結果被問到口啞啞！被網民挖出後，不少網民都引用電影《家有囍事》吳君如的名台詞：「乜又係你呀陳生？！」來恥笑此事。

國泰澄清：內容毫無根據及完全失實

而有媒體向國泰航空查詢事件，國泰則回覆到已得悉社交媒體上相關帖文，但確認其內容毫無根據及完全失實。國泰重申，機艙服務員招聘日僅安排了兩位國泰航空總經理發言，並無安排任何申請者接受媒體訪問。同時指出於一連兩日的招聘日中，安排了逾200名申請者面試，亦開放予任何人士即場應徵。當天亦有叮囑傳媒在自行訪問個別申請人時，需徵詢受訪者同意。