我個人比較膚淺，去旅行真係為咗吃喝玩樂。除咗買手信畀朋友之外，一律唔接受「手信購買list」。有心嘅自然會送，冇心嘅，去阿信屋買幾包薯片畀你，你收到都尷尬啦係咪先？
正所謂物以類聚，我身邊嘅朋友每次去旅行都會買啲令人Ｏ晒嘴嘅嘢做手信，佢哋話咁樣先夠特別，一世都記得自己去過邊個國家⋯⋯
01 | 去日本韓國買米
相信好多人都會咁做，5kg、10kg 咁托啲米返香港。的確，日本、韓國嘅珍珠米真係好食好多，去韓國買又平，有時寧願買少幾件衫，都想買包米返香港。
02 | 買日本刀
唔係講緊萬用刀或者廚房用刀啊！係日本武士刀啊！有個朋友因為多年前玩過某隻戰國嘅電腦遊戲，變成日本歷史迷，成日都話想買把妖刀放喺屋企。有次同佢去旅行，海關問佢攞住把嘢咁長係咩嚟，佢雙眼發光咁向海關介紹自己把刀⋯⋯
03 | 泰國佛牌
近年好多人都鍾意戴泰國佛牌，喺街都見唔少人戴到「滿身神佛」。有個朋友去到泰國，諗住喺當地買佛牌會比較有效。但其實喺泰國買都唔代表一定有效，去黃大仙拜嘅平安符都唔一定係真啦係咪先？
04 | 買原木家具
去旅行真係令人購買慾大增，喺香港見到貴嘢，可能會覺得唔值，但去到外國就忍唔到手。有朋友去到歐洲見到原木靚家具，就忍唔住買咗返香港，返到屋企先知唔夠位放，最後只好賤價出售。
05 | 夾公仔停唔到手
喺日本夾公仔舖夾公仔嘅成功率比起香港、台灣都高好多，仲可以叫職員幫手，而且禮物非常吸引，令人想夾完再夾。結果係咩？最慘嘅唔係空手而回，而係滿載而歸，攞到返屋企就後悔。