人生去咗咁多次旅行,日、韓、台、泰試過,衝出亞洲去英國、歐洲、美國又試過。住過無數咁多間酒店,有平有貴,但無論咩價錢咩級數,總有幾間係超級中伏。伏酒店係超越國際界限,你以為日本好衛生?一樣有勁伏嘅酒店,以下幾間係我親身經歷嘅中伏酒店,如有雷同,實屬不幸!

撰文:藍橘子|編輯:Yuen

1.床底滿布避孕套,半夜有呻吟叫聲

記得嗰次係去新加坡,由於只去短短4日,想搵啲平酒店,最後揀咗間交通方便又平嘅酒店。本來諗住對酒店冇乜大要求,間房細少少都住得落,點知一去到發現唔對路,同網上睇嗰張相完全唔同,相信係十年前影落。

本來諗住對酒店冇乜大要求,間房細少少都住得落,點知一去到發現唔對路,同網上睇嗰張相完全唔同。 | 圖片來源:Flickr
本來諗住對酒店冇乜大要求,間房細少少都住得落,點知一去到發現唔對路,同網上睇嗰張相完全唔同。 | 圖片來源:Flickr

殘舊都算數,衛生最重要!當我喺地下整理行李時,就聞到陣陣腥味,我尋找氣味來源,最後發現床底有好多已使用過嘅避孕套。

半夜隔壁仲傳來陣陣古怪叫聲,我就知道自己租嘅唔係酒店,而係賓館⋯⋯

我尋找氣味來源,最後發現床底有好多已使用過嘅避孕套⋯⋯
我尋找氣味來源,最後發現床底有好多已使用過嘅避孕套⋯⋯

2.熱水煲煮青口

有次去澳洲,大家都知澳洲特別多背包客,仲鍾意喺酒店煮食。但點都冇諗到會有以下奇景。今次間房整理得非常乾淨,我通常入酒店房後,第一件事就係煲水,點知一打開水煲就見到奇景!

有一大堆「藍青口」嘅殼,仲有相信係煮過青口嘅水。竟然有人用酒店個熱水煲煮青口!食完唔清理番乾淨,將啲殼掉番入水煲⋯⋯

不過,就算清潔番乾淨,諗起都幾嘔心。
不過,就算清潔番乾淨,諗起都幾嘔心。

3.冇人吸煙就係非吸煙房間

對比起上兩間,呢間算係小事。話說今次去到澳門,想住一間價錢貴少少嘅酒店放鬆下。出發前預訂嘅係非吸煙房,但當日到達後,酒店職員聲稱非吸煙房已經爆滿。

我唔明白預訂嘅作用何在,處理完一輪後,職員話已經有房間畀我。點知一上到去走廊就知中伏,勁大陣煙味,入到房間聞到好大陣空氣清新劑味,但明顯呢間係吸煙房!

多番投訴之後,最後我得到嘅,只係兩張免費餐券⋯⋯
多番投訴之後,最後我得到嘅,只係兩張免費餐券⋯⋯

去旅行都係想開心,吃喝玩樂定係深度遊,夜晚返到酒店都想瞓個好覺,但遇到中伏酒店,每朝早起身心情都不爽,仲影響晒成個旅程嘅心情,真係多多錢都補唔番。