【旅遊教室】韓國餐廳拒絕單人目錄
回到目錄
1. 最低消費潛規則：餐點以「2人份」起跳
唔少遊客最愛嘅韓式燒肉、部隊鍋（부대찌개）、辣炒雞排（닭갈비）等，其實喺韓國文化入面屬於「圍爐」分享嘅菜式。因此，好多餐廳嘅餐牌上都會低調地寫住「2인분 이상 주문」（2人份起點）。呢個唔係歧視單身，而係商業定價策略。假設你想去弘大食燒肉，見到餐牌寫住豬五花₩15,000，但因為有最低消費要求，你一個人至少要點兩人份，即係硬食₩30,000嘅份量，店家先會招待你。就算你願意畀錢，有啲店家都可能因為怕浪費食材而婉拒，真係有苦自己知。
回到目錄
2. 翻枱率才是王道：單人客=利潤低
喺寸金尺土嘅旅遊旺區，例如明洞、弘大等，餐廳舖租極高，生意好嘅餐廳分秒必爭，非常講求「翻枱率」（테이블 회전율）。試諗下，喺晚餐繁忙時間，一張四人枱如果只係坐你一個，同坐滿四個客相比，店家嘅收入可以相差幾倍。為咗追求最大利潤，店家寧願將枱留俾之後嘅多人客，都唔會為咗你一個而犧牲潛在收入。所以，如果你係獨遊人士，建議盡量避開午市（12-1點）同晚市（6-8點）嘅繁忙時間，揀下晝茶時段去碰碰運氣，成功率會大增！
3. 備餐成本與文化：免費前菜唔係免費
韓國餐廳嘅靈魂之一，就係可以無限任添嘅免費前菜（반찬）。由泡菜、芽菜到醃蘿蔔，閒閒地都有5、6碟，非常豐富。但「羊毛出自羊身上」，呢啲成本其實已經計咗入餐點價格。店家為你一個人準備呢啲前菜，功夫同食材成本同招呼一枱四個客差唔多，但你嘅消費額就少好多，計落條數唔划算。加上韓國人習慣一大班人圍威喂食飯飲酒，獨自食烤肉或部隊鍋反而係少數，所以店家嘅營運模式自然會以服務多人客為主。
其實，被拒絕都唔使太灰心，呢啲只係部分餐廳嘅營運模式。近年韓國「獨食」（혼밥）文化越來越盛行，好多專為一人而設嘅餐廳應運而生。只要識得揀，一個人喺韓國一樣可以食得精彩又滿足！
回到目錄
係咪所有韓國餐廳都唔歡迎一個人食飯？
唔係。主要係烤肉、部隊鍋、辣炒雞排呢類需要多人分享嘅餐廳先有呢個情況。一般餐廳例如湯飯、拌飯、冷麵、刀削麵等，都非常歡迎一個人用餐。近年「혼밥」（獨食）文化興起，亦都多咗好多一人友善嘅餐廳可以選擇。
一個人去韓國旅行，有咩美食推介？
選擇非常多！可以試試豬肉湯飯（돼지국밥）、雪濃湯（설렁탕）、人蔘雞湯（삼계탕）、韓式拌飯（비빔밥）、冷麵（냉면）等。呢啲通常都係一人一份上餐，而且係非常地道嘅韓國美食。如果真係想食燒肉，都可以專登去搵為一人而設嘅燒肉店。
如果真係好想一個人食燒肉，有冇解決方法？
你可以試吓喺非繁忙時間（例如下晝2點至5點）去餐廳碰碰運氣，有啲店家可能會接受。另外，可以主動同店家講你願意點兩人份嘅餐點。最好嘅方法係，出發前上網搵定標榜「1인」（1人）或「혼밥」（獨食）嘅友善燒肉店，而家喺首爾呢啲大城市已經越嚟越多呢類選擇。
