【旅遊教室】曼谷Tuk Tuk司機講呢句即落車目錄
回到目錄
1. 騙案手法一：「大皇宮今日唔開！」
呢招可以話係呃遊客嘅經典開場白。當你喺大皇宮、臥佛寺等著名景點附近想搭Tuk Tuk，司機或者路邊突然出現嘅「熱心人」就好可能會滿面誠懇咁同你講：「The Grand Palace is closed today!」（大皇宮今日唔開！）或者話有特別佛教儀式唔對外開放。佢哋嘅目的只有一個，就係想氹你上車，參加佢哋所謂嘅「城市觀光團」。呢個「觀光團」通常會用20-40泰銖嘅超低價作招徠，但其實只會車你到寶石店、西裝店等購物點遊花園，司機就可以從中賺取佣金或油券。所以，下次聽到呢句，唔使理佢，直接打開Google Map睇官方開放時間，或者堅決表明要去嘅目的地就得。
2. 騙案手法二：「帶你去好平嘅寶石店！」
呢個係「景點唔開」騙局嘅變奏版。司機可能會直接同你講，可以超平價錢（例如100泰銖）包車一個鐘，條件係要順路去幾間舖頭睇吓，仲會強調「Just look, no need to buy」（齋睇唔使買）。好多遊客心諗齋睇唔買都冇壞，點知一入到舖頭，就會被店員用高壓式手法瘋狂推銷，唔買都一身蟻。記住「便宜莫貪」，喺曼谷街頭，一個正常嘅Tuk Tuk車程都唔止呢個價錢，超乎常理嘅平價背後一定有古怪。想避開呢個陷阱，最好嘅方法就係堅持明碼實價，只去自己想去嘅地方。
回到目錄
3. 騙案手法三：上車前唔講價，落車先開天殺價
雖然呢個唔算係一個好有鋪排嘅「局」，但絕對係最直接同最常見嘅劏客手法。好多遊客心急，一截到Tuk Tuk就跳上車，冇同司機事先傾好價錢。結果到埗後，司機就開出一個比正常車費高幾倍嘅「天價」。例如一個原本只需150泰銖嘅車程，佢可能會開價500泰銖。為咗避免爭拗，上車前一定要用手機地圖show出目的地，同司機清清楚楚、白紙黑字咁傾好一個固定價錢。如果佢開價太離譜，唔使怕，笑一笑行開再搵過第二架就係，曼谷街頭大把Tuc Tuc！
只要保持警覺，對太過「著數」嘅提議有所保留，並且堅持「先講價，後上車」嘅黃金法則，搭Tuk Tuk其實都可以係一個好玩又安全嘅體驗。下次去曼谷，就可以放心享受呢份獨有嘅地道風情啦！
回到目錄
喺曼谷搭 Tuk Tuk 點樣避免被呃？
上車前一定要同司機清楚講明目的地同議定好價錢。對「景點今日唔開」或者「超平價觀光團」呢啲講法要保持警惕，最好用Google Maps輔助確認路線同景點開放時間。
如果 Tuk Tuk 司機堅持要去寶石店，應該點做？
態度要堅決，直接拒絕並要求司機載你到原定嘅目的地。如果司機唔合作，就應該立即要求落車，唔好同佢繼續糾纏，然後再搵另一架車。
Tuk Tuk 車費大概幾多先算合理？
無一個固定標準，但一般嚟講，市中心10-15分鐘嘅短途車程，合理價錢大約由100至200泰銖起。價錢會受距離、交通狀況同議價能力影響，最重要係上車前雙方達成共識，覺得價錢唔合理就唔好上車。
