現大量MIRROR演唱會門票轉讓
MIRROR去年演唱會人人都知一票難求，有鏡粉指網上有黃牛開價每張門票6萬元，更有二手網上平台標價44萬元，非常誇張！而普遍炒價亦升至大約10倍或以上，原價$480的門票一度炒至約$6,000，原價$1,280的門票亦高見$7,000或以上。點知今年網民就發現網上就極多人轉讓MIRROR演唱會門票，而且全部都係原價，甚至仲有唔少標榜係靚連位！
演唱會已經炒唔起 網民慨嘆MIRROR大勢已去
唔少網民見此情況慨嘆MIRROR似乎開始大勢己去！自去年演唱會發生意外後，明顯地MIRROR少咗好多應援以及廣告代言，有網民就分析可能因為通關問題，大家唔再困喺度，亦有網民認為係去年買咗的人補返飛，所以今年變咗少人買「之前又話炒到50萬一張」、「因為可以用去年concert飛換今年飛，有幾萬人已經有飛，可能而家賣返啲差位出黎」、「姐係有人脫粉同埋冇人要」、「年輕人已經去晒追韓星，去旅行」、「我自己睇演唱會經驗呢啲飛而家平手走。去到show前就要劈先走到」。
《MIRROR FEEL THE PASSION CONCERT TOUR 2024 • HONG KONG》記者會6大重點
1. 巡迴演唱會開9站 上半年走匀亞洲 歐洲 北美洲
MIRROR在記者會上公開了巡迴演唱會的詳情，今次演唱會將會在亞洲、歐洲以及北美洲，共9個地方舉行。亞洲包括：香港、澳門、新加坡、吉隆坡；歐洲包括：倫敦、曼徹斯特、洛杉磯；北美洲則包括：三藩市、紐約、多倫多，目前暫定每個地方開一場，並預計會在2024上半年完成演出。各站巡迴演出的資料將於稍後公布，而各位粉絲們現時亦可於https://concerttour2024.mirrorweare.com/tc查閱。
2.演唱會準備進度 海外新items有待商議
當被記者問到演唱會的準備進度時，隊長Lokman（楊樂文）表示：「如火如荼，密鑼緊鼓，行程滿滿」，又透露現時的進度：「排緊舞，就嚟準備Band rehearsal」。Lokman亦透露演唱會依舊會有小組表演，更大爆今次的小組會有驚喜，是意想不到的組合。而被問到海外演唱會會否有特別表演時，副隊長（江𤒹生）則表示：「大致上可能一樣，但係都可以會有唔同」，並表示要待香港場完成後再商議。
3.成員密密出歌 Tiger或有機會成下位solo
每逢演唱會前夕，MIRROR成員們都會盡量出多一兩首歌。早前被傳是下位出solo的Tiger（邱傲然）稱：「等緊安排」，並表示：「距離演唱會仲有一個月，到時就會知」，為是否出solo一事保持神秘感。而於上月中推出新歌《夜視鏡》的Ian（陳卓賢），亦於訪問時透露：「如無意外就應該呢個禮拜撞到出黎（推出）」，不過就非常口密唔肯公布是否跳唱歌。而正在進行新歌MV拍攝的Anson Lo（盧瀚霆），則透露新歌的推出日期會是演唱會前：「如無意外都會係1月頭出」。
4.《社內相親》親熱戲fans唔夠喉 狂追幕後花絮
上星期播完的翻拍劇《社內相親》有不少的親熱場口，粉絲們亦對Anson Lo和Edan在劇中的親熱戲表示「唔夠喉」，紛紛跪求推出幕後花絮版本。而Anson Lo則怕醜表示：「點到即至，學導演話齋要比啲相像空間大家」，更稱目前播出的場口的數量和激烈程度都與韓版差不多。而Edan則表示：「唔夠喉好過太多」，更稱「其他鏡頭可能冇咁好睇，導演應該揀咗啲最精髓嘅畫面」。
5.姜濤認有收通知做林海峰演唱會嘉賓
早前現身林海峰演唱會擔任嘉賓的姜濤，在今日見記者時亦有回應此事：「一開始係有收到通知做嘉賓，但係因為團嘅彩排好多，所以一直都冇confirm」，更表示當日是拍完MV後才去演唱會現場。對於姜濤曾表示演唱會前不會擔任嘉賓一事，外界有不少人都認為姜濤今次現身林海峰演唱會，是否與即將舉辦的叱咤頒獎禮有利益關係時，他則未有回應，並由Anson Kong代為表示：「呢啲嘢1月1號就會知」。
6.12子喜聞阿Mo可出院短聚 睇演唱會要尊重本人意願
去年因MIRROR紅館演唱會嚴重受傷的dancer李啟言（阿Mo），早前可以短暫出院與摯友見面，對此MIRROR成員們都表示喜聞阿Mo的情況有改善。而當被記者問及會否邀請阿Mo去睇演唱會時，Anson Kong則表示：「呢啲要睇翻佢哋意願」，以阿Mo及其家人的想法為主。而到醫院探望阿Mo一事則仍然有待公司安排。
一齊睇返MIRROR的演唱會詳情5大整合
1.香港站共開16場 仲包埋成員生日
MakerVille宣布MIRROR的演唱會將名為《FWD富衛保險呈獻：MIRROR FEEL THE PASSION CONCERT TOUR 2024 . HONG KONG》，並將於明年1月及2月共在亞洲國際博覽館Arena舉辦16場，包括：2024年1月15-17，19-22，24-27，29-31，及2024年2月2-3日。當中1月21日的場次更是成員呂爵安（Edan）的生日！
2.票價最貴$1480 價錢媲美韓團演唱會
演唱會的票價共有3種，分別是$680/$1080/$1480，而去年的票價則為$480/$880/$1280，2024年的演唱會每個價位都貴了$200，價錢直逼韓團來港演出的價錢。
3.首個巡迴演出
在MakerVille今日公布的資料中，是次的演唱會有別於去年，將會以巡迴演出的方式進行演出。而作為本地男團的他們亦將以香港為首站，其他演出地點仍然有待公布。
4.MIRO設優先買 演出有直播飛賣
今次的演唱會售票安排與去年相同，MIRROR官方歌迷會將會設MIRO優先購買。凡於MIRO優先購票當日會籍仍然有效的粉絲，都可於享受優先購買，而本年度MIRO會籍到期日為2023年12月31日，而公開發售的詳情將於MIRO門票發售後再作公布。是次演唱會將與以往一樣，設有網上直播，而直播場的票價有待公布。
5.補場安排
至於受去年演唱會影響而需要進行補場的粉絲，更多的補場演出詳情將於11月21日在MakerVille的社交媒體上公布，所有成功申請兌換補場演出門票的觀眾都將會獲分配到是次演唱會的指定場次。
還有什麼演唱會消息？
無論是本地歌手還是外地歌手都即將在香港舉行演唱會，即睇：演唱會時間表及購票資訊，包括MIRROR演唱會門票兌換安排、容祖兒、鄭秀文、張學友、鄭中基、溫拿、羅志祥等。