見證香港劇集60年起跌 夏雨直播講感受語重深長
夏雨在直播中坦言，昔日香港電視製作曾經領先全球，令世界各地華人都在港劇中學習廣東話，又輸出大批製作人才「開枝散葉」，可惜這份最光輝時刻如今卻「變到依家好似有啲凋零」，幸而今次劇集成功重新為業界帶來曙光與希望。
夏雨力讚低成本溫情劇集重燃電視圈希望
今次年屆80嘅夏雨跟74歲郭鋒合作壓軸單元，備受讚賞，夏雨讚賞這一部「成本唔係好高、冇咩好天王巨星嘅製作」，卻能成功吸引大批觀眾重新回到電視機前。他期望未來能有更多同類高質素劇集湧現，更揚言「我做唔做都唔緊要」，只要能看見香港電視業再次步向世界巔峰便心滿意足。
「一個成本唔係好高、冇咩好天王巨星嘅製作，居然亦都可以搵返晒咁多觀眾嚟睇返呢一個戲，即係話呢，香港嘅製作呢，係仲有希望。我睇到呢一班製作嘅人才，導演啦、一班編劇啦、一班新嘅演員啦，一個咁嘅組合，終於可以有個令到觀眾發返嚟電視機旁邊嘅一個契機。咁我希望多啲呢啲製作出現，觀眾呢亦都再將香港嘅電視製作呢，推向世界嘅巔峰 ，我做唔做都唔緊要，我好樂意睇到呢一個情景。多謝！」
導演力讚夏雨演出靈活觀察力強
劉偉恒在昨晚直播中，分享了跟兩位資深前輩合作的感受劉偉恒坦言起初曾擔心前輩演繹方式會帶有濃厚傳統「大台味」，佢強調並唔係對傳統劇集有見，而係考慮到今次作品傾向平淡實感曾經一度陷入兩難，盤算應否提醒前輩別將「拿手絕技」搬入劇中。
導演表示：「但係我好難直接同佢講『夏記，不如你唔好用嗰種演法』，唔通直接叫佢『平淡啲』咩？開到口又驚好唔尊重⋯⋯」
不過開鏡之後，佢先知係自己過慮：「夏雨哥係非常精準地觀察到整套劇所需嘅情緒水平與氛圍，演繹方式完全融入劇組，絲毫沒有出現與其他演員（如潘燦良、張錦程等）節奏不合的情況。夏雨甚至會主動在現場詢問：『點呀？你講真係咁做㗎？我畀個第二個版本你都得㗎喎！』 」
零架子帶動GenZ新演員入戲
作為前輩零架子，過足戲癮演出極具彈性，與郭鋒拍檔帶住新演員時 ，展現出極高的專業敏銳度，令人敬佩。作為GenZ代表嘅「腎仔」蘇文濤，在一開始的宣傳亦有透露——「夏雨」呢個名只係傳奇般存在，平時會用嚟同Friend玩「食字Gag」，無諗過可以見到真人兼同場對戲！
Dixon黃奕晨「新角度欣賞老豆」
參與昨晚直播嘅Dixon黃奕晨亦對兩位前輩讚不絕口，透過今次跟阿爸夏雨合作，令佢由全新角度學識欣賞老豆。佢指出夏雨和郭鋒最厲害之處，在於能保留觀眾對其親切感與經典印象，同時又能切換到完全不同的表演語言，面對新一代演員、尤其沒有傳統電視台背景的都可以流暢對戲：「佢哋可以講得通、我哋聽得明白佢哋做緊啲咩，呢個真係『演員嘅修養』！」
「頂級演員嘅深厚功力」
劉偉恒更透露私下與剪接師討論，笑稱「有時真係唔使睇，單係聽夏雨哥講對白把聲，都覺得好好聽！」導演強調無論係夏雨個人Emo 嘅戲份，還是與郭鋒等人的對手戲，兩位都精準呈現出劇本所需的效果，展現出頂級演員嘅深厚功力！
網民力讚夏雨表現寶刀未老洗甩「大台味」
觀看直播後紛紛留言感謝劇組帶來一部充滿人情味與共鳴感之佳作。不少網民表示《日落下的彩虹》成功喚醒大眾對昔日屋邨互助精神之懷念，又讚賞年屆80嘅夏雨演出精彩： 「夏雨和郭鋒早在七十年代已經演出《獅子山下》，扮演升斗市民，今天能夠在此劇中看到當年影子，又添幾分喜感做歡喜冤家，實在感恩。」、「夏雨真係不得了，喺TVB做咗咁多年，走去ViuTV拍劇，竟然仲感覺到佢演技更上一層樓無咗《溏心風暴》系列嘅聲嘶力竭，換嚟呢套劇嘅收放自如，幾個重要嘅場口，都係用輕微嘅表情同反應去處理咗，好自然，好感人最匹配嘅係，要先『下雨』，才可見『彩虹』，導演每個選角都極之出色，係一套值得香港人由頭煲到落尾嘅劇」、「與其話viu tv專門 接收TVB唔要嘅老戲骨，不如話Viu Tv喺佢哋生涯晚期，仲願意俾機會佢地過下戲癮。我諗呢套劇可以成功令佢哋再次變到街知巷聞！」
