遠赴英國進修演技 510 坦言突破語言與性格框架
談及近況，劉偉恒提到自去年 12 月劇集殺青後便很久沒見過 510（吳伊琳），並關心她目前身在何處。510 透露：「我依家喺英國讀緊書，但我有工作，所以我返咗嚟（亞洲），依家自己旅行中，下個禮拜就返香港。」 被問到遠赴英國進修演技的得著，510 表示用第二語言演戲是一大考驗：「用 Second Language 去演戲，其實係好唔同嘅感覺，哪怕一句說話……例如用母語講『爸爸』，同用英文講『Dad』或『Papa』，Touch 唔到自己，呢個係一個問題。」
她又分享在課堂上導師精準的指導：「我有啲 Monologue 獨白，讀嘅時候有些些卡卡地。老師喺大家面前點評，真係一擊即中！佢叫我分清楚嗰句係自己同自己講，定係同緊人哋講，即刻點到個問題所在。」 她提到當地的戲劇訓練極度注重基礎，甚至會花上一整年時間專門進行肢體與聲音的熱身（Warm-up），令她大開眼界。
劉偉恒導演問及花半年時間去國外進修的動機，510 坦言，去年拍攝完首部做主角的電影後感到迷惘，發現自己在細節處理上有不足。同時她也想突破自己性格上的限制：
510：「我個人比較循規蹈矩，好容易框住自己。如果有啲角色同我本人的性格或習慣相差好遠，譬如好唔負責任、或者好 Chill、食煙去 Disco 嗰啲，我就會做唔到。我諗換一個環境去 Explore 下，對我身心靈都有幫助。」
聽完 510 的分享，周家怡羨慕表示：「我好想去呀！我都好想經歷利用一個 Second Language 去試去演，我覺得係一件好正嘅事。」
周家怡力薦 510 演少年版
提到《日落下的彩虹》第 9 集中 510 再次登場、被男神 Tony綁鞋帶的一幕，劉偉恒大讚兩人的神似度，並爆出選角秘密：「當日要搵周家怡嘅後生版，家怡第一件事就同我講：『喂，點解你唔諗……唔搵 510？』」周家怡親自解釋力薦原因：「因為之前我哋《翻盤下半場》嗰陣，510 做過我個年輕版。嗰時我已經覺得：『哇！咁似嘅！』」 周家怡更分享了一段現場拍攝的趣事：
周家怡：「其中一幕510打電話去電台大鬧渣男，我聽住錄音，心諗我有拍過呢場戲咩？我有講過呢啲嘢嘅？跟住我話：『哈？好似冇講過呢啲嘢喎。』跟住劇組就話：『唔係你，依家係 510 嚟呀。』跟住我心諗：『哇！咁似嘅，起雞皮呀！好似呀！』」
周家怡盛讚 510 是一位極具天賦的演員：「我真心覺得佢好好！嗰時睇你啲戲呀，Even 你有些網絡短片演出我都有睇，我都覺得佢係超 Talent！」
導演爆料完全沒有事前溝通！「雙 Alice」動作神同步之謎
導演劉偉恒在直播中提問，觀眾紛紛留言好奇周家怡與 510 演出的 Alice 為何連推眼鏡等小動作都如出一轍，兩人是否有事前私下交涉。510成熟地作出回應：「冇，我諗係我哋對呢個角色的判斷。」周家怡補充：「我諗我哋兩個都對 Alice 呢個角色有一個同樣嘅睇法，我成日都話『角色有命』嘅！」 周家怡更笑言，兩人在劇照中的身高、甚至笑容都完全一致。劉偉恒也回憶現場拍攝時，工作人員對 510 的評價極高，大讚她私下文靜乖巧，一開機卻又能完美切換成「辣椒姐」年輕時的霸氣與少女情懷。
510: 小學畢業冊早已許願當演員
談到演藝夢想的起點，510 透露雖然大眾是透過《試當真》認識她，但其實自己從小就想當演員，只是一直不敢承認。「最近有個小學同學 Send 咗張相俾我睇，係我以前寫嘅小學畢業紀念冊。我睇返原來我以前寫夢想係想做演員！我估唔到我……我竟然承認過呢件事。」
感謝《試當真》： 佢帶咗「錦程」畀我
她特別感謝《試當真》游學修帶她入行，並讓她結識了戲劇導師張錦程，跟隨對方學習戲劇長達四五年，導演劉偉恒也有補充，有份參演《日落下的彩虹》嘅張錦程私下對510讚不絕口。她亦感謝媽媽從當初的擔心轉為全力支持：「考完 DSE 我本來升讀幼教，後來參加《校花校草》比賽，媽咪見到我好 Enjoy 同有成就感，佢原本叫我『試5年啦』，但我同佢講我冇限期嘅！佢依家比我更加關注我嘅動向，成日 Cap 晒相同埋留意我嘅報導。」（Hi Auntie ！）
家怡&510 演技「高峯對談」：演戲好爽！
直播中段，周家怡與 510 熱烈探討演戲的樂趣，510 認為「演戲好爽」，尤其能是突破自身性格去展現角色習慣，並在與對手互動中產生意想不到的火花。周家怡聽完深受共鳴，並補充拍攝現場與鏡頭配合的樂趣：
周家怡：「到你遲啲再將你學到嘅演技、Technique，加埋你再了解 Camera Work，了解點樣用鏡頭去呈現一件事，再將你嘅演技加埋個鏡頭去走位，仲好玩！你會發現原來喺鏡頭入面，我個感覺同鏡頭角度、走位，點樣可以拉長時間俾自己去做演嘅過程，做完會覺得『Yes！』嗰種好爽嘅感覺！」
導演劉偉恒在旁笑言：「睇到兩個好鐘意演戲嘅人喺度傾偈，講起演戲就好開心！喺導演的角度，見到演員咁投入，真係好高興。」
預告明日直播精彩內容
直播尾聲，劉偉恒預告第 10 集將會是「愛情單元」四位主角線路的階段性結局，明日直播更邀請到幕後為劇集獻唱片尾曲的三位歌手（包括 Kaka、Bernard 及 Herman）作嘉賓，並會揭曉彩虹邨 Busking 拍攝背後未曾曝光的故事。
第十集劇情預告 ：Tony表白、Alice有親吻戲 家欣陷兩難
家欣受子柏介紹在邨內打工，嘗試重過新生告別騙子身分，卻遭大鈞找碴當街侮辱，子柏為護花挺身而出推撞大鈞。子柏隨後向家欣坦白與父親昔日恩怨，家欣承諾陪伴在側，然而大飛突如其來發出求救訊息，令重情義家欣陷入兩難局面。另一邊廂，Tony得啟發研發屋邨法菜融合菜單，並向Alice表白成功，兩人展開浪漫約會。
