柯文立手揸貓紙復仇 挑戰急口令兒歌嚇壞評判
上回挑戰僅差7秒就失敗的柯文立，今次誓要「喺邊度跌低就喺邊度起翻身」，再度挑戰經典兒歌《自動勝利Let’s Fight》。此曲旋律快、歌詞密，極考驗換氣技巧。為此，柯文立做足準備，帶來一張寫滿密密麻麻記號的「貓紙」，上面全是上次唱錯的地方，決心十足。然而，他一開口即出現「紅Bar」，關鍵位更被「DANGER」警號追殺，緊張氣氛令評判Desta和Eric Kwok都嚇到大叫：「嚇死人咩」、「你好唔專注」、「直情入錯」、「好牙煙呀」，場面驚險萬分。
士司機崔可迪曾爆喊 揸車狂聽《狂野之城》練歌
另一位復仇者崔可迪，為了挑戰郭富城的《狂野之城》，竟利用兼職揸的士的時間瘋狂練習，他笑言：「有個客問我你係咪好鍾意郭富城？係咁重複聽。」上次的失敗對他打擊甚大，他自爆曾因此爆喊，更坦言：「我要畀好大勇氣先至睇（《唱錢》）。」比賽時，崔可迪神情極度緊張，左手左腳不由自主地跟著節拍擺動，全場都為他捏一把汗，特別是Eric Kwok，他肉緊地表示：「我真係最想你過到。」
網民睇到勁肉緊：小人物奮鬥好勵志！
兩位素人的奮鬥過程引來網民熱議，紛紛表示睇得相當投入。有網民留言：「睇到手心都出汗，好想佢哋成功！」、「柯文立份貓紙仲勁過我以前考試出貓！好有心！」、「的士司機大哥好慘，聽到佢話爆喊唔敢睇電視，好心酸。」、「呢啲先係素人參賽者嘅魅力，夠晒真實！」、「Eric Kwok個樣勁緊張，睇得出佢真心想崔可迪過關。」
