Uniqlo再度聯乘Pokémon推出全新T-shirt系列，今次以初代《寶可夢 紅/綠/藍》黑白像素風格為主題，紀念系列誕生30週年。成人款全線採用Game Boy時代單色設計，當中多款暗藏玩家級彩蛋，令一眾老玩家即刻陷入回憶殺——而成人款定價僅1,990日圓，折合約港幣107元，抵到網民話 “唔買對唔住自己”。

初代啟動畫面直接印上身經典到爆

整個系列以1996年初代遊戲為靈感，設計團隊將Game Boy年代嘅黑白像素美學完整還原到T-shirt之上。其中一款直接採用《Pokémon Red》遊戲啟動畫面作為圖案，對於當年捧住Game Boy通宵練精靈嘅玩家而言，呢個畫面絕對係青春嘅象徵. 另一款則印有八位道館館主代表寶可夢——大岩蛇、寶石海星、雷丘、霸王花、雙彈瓦斯、胡地、風速狗同鑽角犀獸，左袖口更附上八枚道館徽章，將打機時逐個道館攻略嘅成就感直接穿上身，設計巧思令人拍案叫絕。

超夢皮卡丘暗藏彩蛋翻開口袋有驚喜

系列中最搶鏡嘅莫過於超夢同皮卡丘兩款設計。超夢款正面印有經典像素造型，但真正嘅彩蛋藏喺背面下擺位置——要行到背後低頭先會發現隱藏嘅超夢身影，完美重現當年喺遊戲中尋找超夢嘅神秘感。至於皮卡丘款則採用初代圓潤肥嘟嘟造型，更係全系列唯一設有口袋嘅款式，翻開口袋內側即見進化後嘅雷丘圖案，呼應遊戲中 “咦？皮卡丘正在進化！” 嘅經典一幕。兒童款方面則加入彩色元素，致敬Game Boy Color年代，為細路帶來更活潑嘅視覺效果。

成人款僅售約港幣107元7月24日正式開搶

全系列將於7月24日正式發售，成人款定價1,990日圓（約港幣107元），兒童款則為990日圓（約港幣53元），消費者可透過Uniqlo官方網站進行線上訂購。以呢個價錢就能入手一件充滿回憶殺嘅聯乘單品，對於伴隨初代寶可夢成長嘅80、90後玩家嚟講，呢個系列絕對係今個夏天最值得入手嘅情懷之作。鍾意嘅朋友記得準時上網搶購，以免向隅。