機迷同鐵道迷注意！繼《Final Fantasy》、《Pokémon》後，日本JR東海（JR Central）又有新搞作，今次竟然破天荒同美國暴雪（Blizzard）人氣大作《Overwatch》聯乘，推出「Payload to Osaka」主題活動！由官方釋出嘅宣傳圖可見，人氣角色半藏、D.Va、源氏、霧子、慈悲（Mercy）、火爆鋼球（Hammond）等齊齊搭新幹線殺到大阪，火爆鋼球仲食緊章魚燒，半藏就歎緊豬肉包，完全融入當地！活動將由7月17日橫跨到9月23日，粉絲們準備好朝聖未？
粉絲搭車必玩！答問題免費拎走7款限定手機Wallpaper
今次聯乘活動絕對唔係得個樣！只要喺活動期間登上JR東海嘅新幹線列車，就可以用手機參加《Overwatch》主題問答遊戲。每次系統會隨機抽出10條問題，只要答啱問題，就可以免費獲得一張限定手機Wallpaper！全套Wallpaper總共有7款，官方保證喺集齊一套之前唔會抽到重覆款式，粉絲可以喺車程中無限次挑戰，誓要儲齊一套！另外，只要喺車上填寫網上問卷，唔單止可以拎到PC版Wallpaper，仲可以憑乘車記錄，去到大阪日本橋嘅Animate分店換領一張印有主視覺圖嘅限定清潔布，真係攞到手軟！
宣傳圖意外引發公關災難？外國粉絲怒轟Mercy衣著醜出天際
事件曝光後，大批機迷都表示超級期待，準備好去日本課金支持。不過，呢張充滿大阪特色嘅宣傳圖，竟然辣㷫咗外國粉絲！有位外國網民喺Twitter（現稱X）睇完張圖後大為不滿，直接點名怒轟Mercy身上套衫，留言大鬧「What is this kind of OUTFIT? ugly as hell」（呢啲係咩衫嚟㗎？醜到地獄！），更用全大楷英文表達強烈不滿，隨即引發網民熱議，唔少人對Mercy嘅「時裝車禍」表示不解。
官方解畫另有內情！原來Mercy造型完美還原大阪大媽Style
正當大家以為係公關災難之際，有熟悉日本文化嘅網民就出嚟解畫！原來Mercy呢一身「災難級」打扮並非亂嚟，而係為咗「入鄉隨俗」，完美還原大阪獨有嘅時尚文化！大阪嘅女士，尤其係中年婦女（大阪大媽），出名鍾情各種浮誇嘅動物圖案，例如豹紋、虎紋等。所以Mercy呢一身造型，其實係官方特登加入嘅大阪在地元素彩蛋，充滿心思！雖然官方都特別發文溫馨提示，所有限定品都係「日本限定」，但呢個小插曲反而令更多人認識到大阪獨特嘅「大媽時尚」，可以話係另類嘅成功宣傳！
