港女體檢抽血出門前少做一步 護士一句話令佢嚇呆兩日後再傳噩耗

清晨8點幾趕抽血護士一句話令事主當場嚇呆

事主在社交平台Threads分享經歷，表示當日進行身體檢查需要空腹抽血，一瞓醒就急急腳趕去診所，出門前完全無飲夠水。到抽血時，事主已覺得過程異常漫長又痛楚，護士隨即問佢係咪今朝飲唔夠水，接著講出一句令佢當場嚇呆嘅說話——血液太「擎」好難抽。事主望向抽血筒，發現入面嘅血液竟然呈現非液體狀態，完全唔似平時見到嘅正常血液。抽血完畢後，事主撕開膠布更驚見手臂出現大片瘀青，令佢大嘆「抽血無數次，今次真係最差」。

事件曝光後網民紛紛留言傳授減痛抽血秘訣

事件曝光後，大批網民替事主不值，不少過來人紛紛留言安慰並分享實用貼士。有人傳授灌水秘訣，指抽血前半個鐘內飲一樽水左右就得，唔使太早飲定，仲分享自己捐血經驗，指飲夠水幾分鐘就輸出450ml血，反觀隔離無乜飲水嘅人捐咗成十分鐘. 亦有人提醒前一晚同起身時飲返多少少水，血液易抽之餘亦唔容易凝結。至於手臂瘀青問題，有網民解釋通常係抽完血後按壓唔夠時間所致，叮囑事主下次記得充分按壓傷口。更有同病相憐嘅網民分享慘痛經歷，指試過抽血中途停咗唔出血，護士左郁右郁先救得返支血，最後仲要換位抽埋手背，兩邊都瘀晒。

兩日後診所來電通知結果令事主再度崩潰

原以為捱過一次痛楚就完事，點知噩夢仍未結束。事主兩日後收到診所電話，對方通知其中一筒血液送到化驗所時已經凝固，根本無法進行化驗，要求事主飲多啲水再返去重新抽血。換言之，事主因為出門前少做「飲水」呢個簡單步驟，不但白捱一針皮肉之苦，仲要再多捱一針補抽。事件提醒所有需要空腹抽血嘅人，即使唔可以食嘢，抽血前適量補充水分係不可忽略嘅關鍵一步，否則隨時同事主一樣慘要捱多針。