23樓窗外驚現馬蜂巢｜網民教用茶飲射走 專家急現身揭恐怖後果

23樓住戶窗外驚現馬蜂築巢急求助

事主（Threads用戶@zmc_34）最近在社交平台Threads發帖，分享自己住在23樓高層單位，窗外竟然出現一個馬蜂巢，令佢非常困擾。由於唔敢貿然處理，事主唯有上網問其他人意見，表示聽人講只要唔去搞個蜂巢，到冬天佢哋就會自然消失，想確認呢個講法是否屬實。帖文迅速引起大量網民關注，紛紛留言出謀獻策，有人建議掛一個脹卜卜嘅牛皮色紙袋喺蜂巢附近，聲稱蜜蜂見到會以為係另一個蜂巢而自行搬走，更有不少網民提議去超市買大樽裝茶飲，利用樽內壓力當作「津路水炮」強力噴射蜂巢，甚至有人教買強力殺蟲劑瘋狂噴灑。

專家緊急現身鬧爆網民危險建議

事件曝光後，一家專門保育蜜蜂及研究授粉昆蟲嘅社企專家（Bee Tales HK）隨即現身留言區，直斥網民提出嘅方法極度危險。專家解釋馬蜂防衛心同攻擊力極強，一旦受到外來攻擊，必然會群起飛出瘋狂反擊，住戶自己動手處理隨時惹禍上身。至於用殺蟲劑噴灑，專家亦指出市面上普通殺蟲劑有一定毒性殘留，對高層住宅環境而言並非安全或可持續嘅做法，勸喻事主千祈唔好聽信網民建議貿然行動。

專家證實馬蜂冬天會自行離開並留下霸氣承諾

至於事主最關心嘅問題——等冬天蜂巢會唔會自然消失？專家畀出肯定答案，確認到了冬天最寒冷嗰幾日，馬蜂會整窩自行離開，呢個係佢哋嘅天然習性。專家分析該蜂巢與事主平日開窗位置有一段安全距離，一般情況下馬蜂唔會主動飛入屋，建議事主可以選擇與蜂「和平共存」多幾個月。不過專家特別叮囑一個重要細節：晚上屋內開燈時，由於外面暗、屋內亮，馬蜂具有天然趨光性，有機會誤闖入屋，因此必須記得關好紗窗或拉上窗簾擋住光線。專家最後更留下霸氣承諾，如果過完最冷嘅日子到明年春季回暖後馬蜂仍未離開，佢會免費上門幫事主處理，仲講明「牙齒當金使」，令一眾網民大讚有heart。