姊妹自導自演「路邊救貓」呃父母收編一年後真相曝光結局意外

國外一對姊妹為咗圓養貓夢，竟然自導自演一場「路邊救貓」騙局，成功令父母信以為真將小貓帶返屋企。最離譜嘅係，父母足足被蒙在鼓裏成年先知道真相，但結局卻令人完全意想不到。

姊妹精心策劃假救貓戲碼騙倒父母

女子「@coookkiieee2」日前在社交平台分享呢段經歷，表示自己同妹妹一直好想養貓，但深知父母唔會輕易答應. 於是兩姊妹決定出動演技，自編自演一場「路邊偶遇流浪貓」嘅戲碼，營造出被「貓咪分配系統」（CDS）選中嘅假象。影片可見，一人坐喺車內負責拍攝，另一人落車走向事先安排好嘅小貓，小心翼翼抱起並裝出驚訝表情，車內嗰位即刻配合驚呼催促快啲帶貓上車。整場演出天衣無縫，父母完全冇起疑心，最終同意收編小貓。

事件曝光後大批網民笑稱太天才紛紛分享經歷

事件曝光後，大批網民睇完都忍唔住笑，紛紛留言：「這樣居然行得通」、「太天才了」、「這也算是一種CDS的使用方式」。更有網民爭相分享自己類似嘅「瞞天過海」經歷，有人話：「我老公至今仍相信，我4年前是在一家商店外垃圾桶旁撿到我的貓」；亦有人表示：「我爸一直以為是因為姪女不能養了，所以不得不把貓送給我們，但其實我們是去收容所收養的」；更有網民笑言自己對狗都用過同一招，8年後先同父母坦白。