身邊個個朋友都話買股票賺大錢，自己冇份入場係咪真係「越做越窮」？近日南韓股市迎來歷史性一刻，綜合股價指數（KOSPI）首次衝上9000點大關，全城陷入股巿狂熱！但喺一片歡呼聲背後，竟然有大批打工仔爆發「股市憂鬱症」，事關眼見人哋賺到盤滿缽滿，自己卻一股都冇，內心極度煎熬。數據更顯示，南韓平均每4個人就有1個係股民，總持股人數高達1455.8萬人，創下歷史新高，喺呢個全民皆股嘅時代，冇份參與真係會焦慮到爆！

韓男崩潰呻越做越窮恐懼錯失發達時機

事件引發南韓社會極大迴響，其中一位30幾歲嘅金姓上班族就向傳媒大呻，表示自己完全冇買入任何半導體股票，眼見股市日日升，但自己份糧就十年如一日，令佢產生嚴重嘅「錯失恐懼」，更逐漸喪失工作意願，崩潰表示好驚錯過呢一波投資時機，最終只會「越工作越窮」，心情跌到谷底。

有買仲慘過冇買選錯股見人發達自己揼心

你以為有入場就一定係贏家？少年你太年輕了！另一位30幾歲嘅劉姓男子，舊年已經開始炒股，但佢嘅經歷可能仲慘過冇買。佢痛苦表示，原來喺牛市中賺錢並唔係想像中咁容易，唔係「買咗就賺錢」，而係要「買啱股」先得！佢呻自己選錯股，手上啲股票股價完全係「牛皮」，郁都唔郁，但眼白白睇住身邊啲人輕易就將資產翻倍，嗰種痛苦真係不足為外人道，只能自己喺度「揼心口」！

資本收入增速驚人全民皆股已成必選項

呢種集體焦慮嘅背後，其實反映咗南韓社會一個殘酷現實。報導指出，喺南韓，資本收入嘅增長速度已經遠遠拋離勞動收入，意味著單靠打份工出糧，財富好可能會被不斷通脹同飆升嘅資產價格蠶食。正因如此，股票投資已經由過去嘅「選項之一」，變成咗現今韓國人嘅「必選項」，形成一股唔買唔得嘅社會壓力，無論買唔買、買啱定買錯，似乎都難逃呢場金錢焦慮嘅漩渦。