正所謂「有錢唔係大晒」，但估唔到有啲人揸住靚車，品格竟然可以咁差！最近內地瘋傳一單離譜事件，有位仁兄揸住部價值不菲嘅路虎（Range Rover）去入油，點知入完油竟然上演一幕「走數」大龍鳳，搞到油站員工勁徬徨，隨時要硬食筆數，真係聽到都覺得嬲！
藉口返車攞錢秒速踩油走佬
事發喺4月9日江西一間油站，一位戴住口罩嘅男子揸住部白色路虎入嚟，要求入滿油，總共盛惠500蚊人民幣（約574港元）。到要畀錢嗰陣，呢位車主就同油站員工講話要「返車攞錢」，員工不虞有詐就行開。點知個車主一上車就即刻踩行油絕塵而去，員工想追都追唔切，只能眼白白睇住部豪車消失喺視線範圍！
網民鬧爆無品車主擔心員工硬食
事件曝光後，即刻引起網民洗版式討論，大批網民替油站員工不值，鬧爆車主行為可恥！唔少人留言話：「開得起路虎，畀唔起500蚊油錢？」、「根本係有預謀，專登呃人！」、「最慘係個員工，分分鐘要自己硬食條數，真係陰功！」大家都一面倒希望可以盡快緝拿呢位無品車主，還員工一個公道。
驚人發現CCTV揭無掛車牌追查困難
油站員工發現被走數後即刻報警，仲翻查埋閉路電視，點知一睇嚇親！原來呢部路虎竟然係無掛車牌，擺明係有心犯案！由於無車牌資料，警方追查難度大增，目前只能靠翻查沿途嘅監控畫面去追蹤疑犯行蹤。換言之，呢筆價值$574嘅油錢，油站員工好可能要自己「硬食」，真係啞子食黃蓮，有苦自己知！
