移加僅4年舊友約敘舊竟全方位「失憶」
樓主早前於社交平台Threads發帖，講述一段令人啼笑皆非嘅舊友重逢經歷。事緣一名移居加拿大4年嘅友人，斷聯4年後突然主動聯絡樓主相約出街。點知約對方去旺角，佢竟然話唔記得旺角喺邊；住咗十幾年慈雲山，佢同樣話唔記得慈雲山係邊。更誇張嘅係，友人連廣東話都聲稱唔記得點講，樓主同佢講「順其自然」，佢反問呢4隻字點解、「自然」係咩意思。交通方面亦一樣離譜，友人問由太子搭地鐵去葵芳係咪要經旺角東轉車。樓主對此深感無奈，慨嘆唔知點同對方溝通，更忍唔住質疑：「佢應該睇唔明中文。」
海外港人群起反擊斥對方行為造作離譜
事件曝光後，大批網民替樓主不值，特別係一眾居海外多年嘅老香港紛紛現身說法狂轟。有移民美國23年嘅網民直言「我全部記得喎，佢係咪移咗40年啊？」；亦有移加30年嘅港人表示「我咪又係識廣東話，雖然返香港會蕩失路，但我依然知道旺角係咩！」更有網民嘲諷「佢應該有早期失智症」，建議樓主「關心」對方健康狀況，叫佢快啲睇醫生。有人更列舉身邊荒謬案例：有朋友日日煲港劇卻話唔記得中文；有人去澳洲Working Holiday摘咗一年蘋果返嚟就扮唔識搭車；甚至有人去韓國旅行兩星期，返港後話唔記得點揸筷子要求用韓國筷子。網民一針見血拆解背後心理，直指完全係「移民優越感」作祟，透過刻意表現對香港嘅「陌生感」嚟特顯自己移民身份。
同路人出嚟講公道話指香港變化確實翻天覆地
不過喺一片斥責聲中，亦有部分移民同路人站出嚟說公道話。有網民坦言香港4年嘅變化可以好大，以前記得嘅車站或店舖可能已經搬晒；亦有人指出如果身邊真係冇人講廣東話，語言能力確實會退步，「啲句子組到亂七八糟、口音又怪」。有移加10年嘅港人分享今年返港經歷，坦言真係唔識搭地鐵、過馬路都驚，但強調「第2、3日就適應返」。最終有網民一錘定音總結：「我4年冇返都搵到點去⋯請問呀朋友喺洞穴匿埋咗幾耐？總結係人嘅問題，完全唔關移民事。」該網民同時承認，啟德機場變晒商場、觀塘裕民坊舊建築冇晒，香港確實變成一個「好熟悉又好陌生嘅地方」，但忘記旺角喺邊就完全說不過去。
