福岡地鐵站內近日出現一部神秘置物櫃，外表睇落同普通locker無異，但打開竟然係新鮮麵包！原來當地政府為咗解決食物浪費問題，喺車站設置全新自動販賣機，專門售賣烘焙店當日賣剩但仍然新鮮嘅麵包。呢個計劃預計每年可以拯救近4噸即將被丟棄嘅食物。

福岡地鐵站變身麵包救援站每日新鮮供應

福岡市政府推動惜食政策，委託專營置物櫃業務嘅Alpha Locker System，喺市營地下鐵七隈線天神南站及橋本站各設置一部置物櫃型自動販賣機。天神南站已於2月20日啟用，橋本站翌日亦正式投入服務. 販賣機入面嘅麵包由知名烘焙品牌BOUL’ANGE天神地下街店提供，包括吐司、可頌等，全部都係因為外觀或數量等原因無法繼續喺門市上架、但仍然喺賞味期限內嘅商品。每部販賣機設有15格置物空間，每格售價約600至800日圓（約港幣30至42蚊），全面採用信用卡及電子支付，唔收現金。

自動降價功能確保麵包唔會過期出售

呢部販賣機最聰明嘅地方，係內置自動降價系統——隨住時間推移，麵包價錢會自動調低，吸引更多人購買。而一旦超過販售期限，系統會即時停止銷售該格商品，確保食品品質唔會出問題。對於經常去福岡旅行嘅港人嚟講，呢種設置喺地鐵站內嘅販賣機極之方便，趕車途中就可以順手買個新鮮麵包做早餐或下午茶，價錢亦比正價便宜，可以話係「執平貨」同「做環保」一舉兩得。

年減3.9噸浪費港人遊日又多個掃貨理由

福岡市政府預估，單靠呢兩個車站嘅販賣機，每年就可以減少約3.9公噸食品浪費。除咗環保效益，計劃亦幫助店家增加額外收入、降低廢棄成本，同時培養民眾珍惜食物嘅消費習慣。對於鍾意去九州自由行嘅港人嚟講，下次去福岡搭七隈線時不妨留意車站內呢部特別嘅置物櫃，用幾十蚊港紙就買到品牌烘焙店出品嘅新鮮麵包，抵食之餘仲為地球出一分力。