Hello Kitty粉絲注意！Sanrio家族陪伴大家成長，不經不覺已經60年！為慶祝這個大日子，官方舉辦的「Sanrio 60週年展：Kawaii的起點」巡迴展覽，歷時5年後終於來到最終站，並於4月9日正式登陸東京六本木！展覽展出大量絕版精品，更有超多打卡位，各位粉絲準備好銀彈同記憶體未？今次錯過，分分鐘要再等60年！

粉絲集體回憶返晒嚟！盤點60年經典角色進化史

今次展覽絕對是粉絲們的時光機！一入場就帶你回到60年前，原來Sanrio最初並不是靠Hello Kitty起家，而是憑著一系列士多啤梨圖案的精品打響名堂！展覽更首次公開大量元祖級角色的早期概念草圖，以及數之不盡的復古精品，由Marron Cream的牙刷套裝，到Pochoacco的文具，全部都係童年回憶！現場更有專區展出當年買禮物附送的「Premium Mascots」小飾物，保證令70、80、90後粉絲睇到眼濕濕，回憶返晒嚟！

必影打卡位逐個捉！同巨型HelloKitty公仔合照

除了回顧歷史，展覽現場更有大量打卡位，絕對令粉絲影到手軟！場內設有多幅巨型角色壁畫，更有超巨型Hello Kitty同Cinnamoroll公仔等你攬住合照！最令人驚喜的，莫過於神還原了Lady Gaga當年震撼全球的「Hello Kitty公仔裙」，粉絲可以近距離欣賞這件世紀級作品，打卡放上IG呃like一流！開幕當日更有Hello Kitty同Cinnamoroll本尊現身，想野生捕獲心愛角色就要碰碰運氣了！

荷包大出血預警！限定精品同主題Cafe點可以錯過

睇完展覽，點可以兩手空空走？展覽出口設有期間限定店，發售大量會場限定的精品，款款都印上60週年Logo，極具收藏價值，粉絲們小心荷包大出血！另外，同場的Cafe亦變身成Sanrio主題餐廳，提供多款可愛到犯規的特色餐飲，無論係Hello Kitty漢堡定Cinnamoroll甜品，都精緻到令人唔捨得食！展覽由即日起至6月21日，各位粉絲快啲上官網訂飛，計劃一趟東京朝聖之旅啦！