去東京旅行，食好西是常識吧！壽司、拉麵、天婦羅食到悶，想唔想試下新嘢？最近有記者就發掘到東京一間隱世餐廳，竟然係由百年歷史嘅日式大宅改建而成，環境靚到似拍戲！喺呢啲地方食飯，好多人第一時間都諗「實係天價啦」，但記者親身試食一個下午茶套餐，埋單個價錢真係嚇一跳，究竟係驚喜定驚嚇？

記者直擊百年和式大宅 人均3,630円歎到10道菜

呢間話題餐廳「お屋敷がんこ たちかわ茶寮」位於東京立川市，前身係昭和初期建成嘅「中野家」大宅。記者由車站行過去都只係15分鐘，一入到去就見到超有氣派嘅日式庭園同古典建築，完全唔似餐廳，反而似去咗參觀歷史古蹟！喺咁高級嘅環境，以為荷包會大出血，點知佢哋個日式下午茶套餐只係盛惠3,630円（約$182港元）！不過要留意，餐廳會再收加一服務費，但就算加埋，兩百蚊都唔使就可以喺百年古宅入面歎下午茶，真係諗都無諗過！

和牛燒牛肉配櫻餅甜品 網民睇相都話要去打卡洗版

事件曝光後，唔少網民都話齋睇相都想即刻飛過去！事關呢個價錢食到嘅嘢完全唔馬虎。鹹點盤有和牛燒牛肉、手毬壽司、笹葉卷壽司同櫻花豆乳葛凍；甜品盤就有櫻餅、御手洗團子、士多啤梨芭菲同水果切盤，另外仲有獨立上碟嘅南瓜湯、季節限定櫻花蛋糕同主菜湯葉（腐皮）料理，加埋兩杯飲品，成個套餐夾夾埋埋超過10款食物！每一樣都整得超精緻，無論係食物定係用嘅陶瓷碗碟，都靚到令人唔捨得食，難怪網民都話「去到一定影相影到手軟」、「IG呃like必去」、「準備定去洗版啦」！

加一後唔使$200港紙 記者教路一個人去都無問題

最後埋單計數，3,630円再加10%服務費，總共係3,993円（約$199港元），二百蚊有找就可以喺百年古宅享受貴族級體驗，記者都大讚物超所值！餐廳入面有吧台位，就算一個人去食都完全唔會尷尬，可以靜靜地望住個靚庭園歎美食。想去東京旅行又想搵啲特別體驗嘅朋友，真係可以bookmark定，下次去就唔怕同人迫，可以過返個充滿格調嘅下午！