復活節長假先完，唔少打工仔已經磨拳擦掌，plan定5、6月再請假去旅行「叉電」，點知臨出發前先傳來噩耗！國泰航空集團突然宣布，旗下國泰及香港快運（HK Express）將於5月中至6月底期間，因成本壓力而取消大量航班，隨時打亂過萬港人的旅行大計，已訂機票酒店的旅客真係「喊出嚟」！

燃油價急升逾一倍國泰快運硬斬大量航班

國泰集團發出公告，指由於近期中東局勢緊張，導致航空燃油價格由2月底每桶99.4美元，瘋狂飆升超過一倍至4月初的209美元！為咗紓緩沉重嘅成本壓力，決定「硬斬」部分航班。國泰航空將於5月16日至6月30日期間，取消約2%客運航班，主要涉及港人熱門旅遊點的區域短途線；而廉航香港快運影響更大，將於5月11日至6月30日期間，取消高達6%的客運航班！消息一出，大批準備出遊的港人即時嚇到個心離一離！

大批苦主湧入討論區洗版鬧爆安排混亂

事件曝光後，大批網民隨即湧入旅遊討論區及社交平台洗版鬧爆，替一眾準旅客大感不值！唔少苦主大呻酒店、車飛、主題樂園入場券「全部book好晒」，而家機票話改就改，全盤計劃隨時泡湯，損失慘重！有網民怒斥：「24小時內轉飛有咩用？我book咗第一日朝早機，佢改我第二日凌晨機，蝕咗成日假同酒店錢邊個賠？」亦有人擔心航空公司所謂嘅「替代航班」隨時係凌晨出發嘅「西時間」，行程大失預算，直指航空公司「又當啲客係水魚」！

航空公司致歉承諾24小時內轉飛旅客須留意電郵

面對旅客排山倒海的投訴，國泰集團就事件對旅客造成不便致歉，並強調已盡力將影響減至最低。航空公司承諾，所有受影響的國泰及香港快運乘客，將會獲安排轉乘原定起飛時間24小時內出發的其他航班，並最遲於今日（4月13日）或之前，透過電郵或手機短訊收到新航班的安排通知。各位準備喺呢段期間出發嘅旅客，記得即刻Check清楚自己嘅Email同SMS，睇下自己係咪「中頭獎」嘅幸運兒喇！