北上消費熱潮持續，不少港人都會選擇搭網約車方便出入。但如果一上車，發現副駕駛座竟然變成一個專業咖啡吧，你會唔會嚇親？近日有內地網約車司機因為喺車內賣手沖咖啡而爆紅，乘客大讚有創意，點知事件瘋傳後，官方平台一句警告，即刻令風向大變！

副駕驚變流動咖啡吧盛惠29蚊杯手沖

事源喺廣東江門，有乘客搭網約車時發現車廂內竟然暗藏乾坤！司機將副駕駛座改裝成一個迷你吧枱，放咗一部專業咖啡機，椅背仲貼埋餐牌，美式咖啡賣22蚊人民幣，一杯手沖Latte更索價29蚊，定價直逼連鎖咖啡店！司機自稱「紅燈咖啡」，聲稱利用等紅燈嘅幾十秒空檔，為乘客即席手沖，儀式感十足。有搭過嘅乘客大讚體驗新奇，車廂充滿咖啡香，司機仲會大談咖啡經，將普通車程變成一場「咖啡文化體驗」。

網民洗版式討論由創業奇才變公路炸彈

事件曝光後，大批網民隨即喺討論區洗版，反應極之兩極！唔少人大讚司機「生意頭腦勁」、「食正條水」，認為係疫後搵食嘅新思路。不過，更多人係鬧爆司機罔顧安全，「邊揸車邊沖熱水，一個急煞就GG！」、「乘客同自己嘅命仔攞嚟較飛」、「簡直係公路計時炸彈」，狠批司機為咗賺錢，將全車人嘅安全當成賭注，隨時出事！

平台發出嚴正警告隨時血本無歸仲要罰錢

正當網民為事件激辯之際，網約車平台「滴滴」終於作出官方回應，為事件一錘定音。平台表示，雖然司機單純放置產品而無主動推銷，技術上未算違規，但就「極度不建議」呢種做法。平台更發出嚴正警告，一旦有乘客投訴影響駕駛或存在安全隱患，司機將面臨嚴厲處分同扣錢，「掙的錢可能還沒扣的多」，隨時血本無歸！呢盤創意生意，睇嚟都係凍過水。