72歲大叔忍夠老妻突提離婚分身家 老妻願做一事求和遭拒 網民揭一隱憂

大叔痛訴多年婚姻活得冇尊嚴堅決要分身家

樓主早前（13日）在社交平台Threads發帖求助，透露72歲父親突然向家人表明要離婚，大呻自己多年來「活得冇尊嚴」，要求平分家產後搬出去一個人住。樓主指母親希望父親冷靜，認為夫妻生活咁多年，凡事忍一忍就過去，但父親態度極為堅決，直言「唔得，無可能返轉頭」。樓主其後更大爆父母日常交鋒細節——母親經常因父親抽煙、霸住廁所等事不停碎念，每次嘈交更會翻舊帳數落父親同父親屋企人嘅不是。而父親則埋怨母親去得太多旅行，樓主聽完都忍唔住反駁父親呢個理由「好荒謬」，直言「今時今日有邊個人唔鍾意去旅行輕鬆下」。不過樓主亦坦言，母親澄清自己先係長期忍受父親嘅一方。

事件曝光後大批網民撐老父追求自由

事件曝光後，大批網民替72歲大叔不值，紛紛力撐佢追求人生最後嘅自由。有人留言話「72歲還佢自由吧」、「都72，畀佢自己選擇自己嘅人生」，亦有網民感慨：「忍咗大半世，得返最尾嗰幾年。一世人，至少做一件對得住自己嘅事。」更有人直言：「忍多兩年人都走埋，含住道怨氣，到時真係變咗死唔眼閉。」有網民分析指，父親可能覺得自己已經喺呢段婚姻中「畢業」，完成咗做老公、做爸爸嘅大部分責任，餘生想為自己而活無可厚非。

網民警示小心棺材本被騙走樓主嘆財力難支撐分居

雖然大部分網民支持老父放手，但亦有唔少人好心提醒樓主要睇實父親嘅辛苦錢，防範有人趁虛而入呃走棺材本。有網民直接警告：「睇住佢啲錢就得啦」、「睇實你老竇睇下有無畀人呃就得」，更有人點出最壞情況：「如果係你爸爸外邊有第二個，佢可能係想分走一半錢同二奶一齊。」面對網民各種分析，樓主無奈大爆最現實嘅致命傷——情感上認同父母放生對方係最好，但財力根本唔容許兩老分居後仲可以維持現有生活水平。兩老目前陷入情感決裂與經濟現實嘅雙重僵局，結局仍然未明。