一位曾經紅極一時嘅日本職業麻雀女神，20歲出道即爆紅，卻喺31歲時突然「登出」東京，搬去一個得6,500人嘅離島生活。4年後嘅今日，佢已經唔再係牌桌上嘅焦點人物，而係每朝5點起身落田嘅全職農夫，靠住一款辣椒殺出一條全新血路。

24歲已預感被淘汰暗自訂下逃離東京死線

松岡千晶現年35歲，出生於東京，自小喺麻雀館長大的她，年僅20歲便成為日本職業麻雀聯盟第28期職業雀士，出道後迅速竄紅。不過風光背後，佢早已感受到行業殘酷嘅現實——大量年輕貌美嘅女流雀士不斷湧入，令佢喺24歲時已經有強烈危機感。當時佢暗自訂下目標：「30歲，或者存到1,000萬日圓（約49萬港元），就要轉行挑戰完全唔同嘅人生。」雖然好快已經儲夠錢，但因為對麻雀嘅熱愛，佢一直猶豫不決。直到31歲，長期捱夜加上東京高壓環境令佢身心俱疲，終於決心離開。

房租由15萬跌至3萬離島生活令佢重新呼吸

松岡最終落腳東京外海嘅八丈島，一個人口僅約6,500人嘅離島。搬過去之後，佢嘅房租由每月15萬日圓（約7,300港元）大幅降至3萬日圓（約1,500港元），居所更由市區狹窄套房升級為連庭院嘅四房老宅。佢好快被島上純樸嘅鄰里文化打動，釣到魚送畀鄰居，鄰居就會回贈自家種嘅蔬菜。移居首兩年，佢一邊打工一邊摸索方向，試種超過30種蔬菜，最終發現當地氣候極適合種植特有嘅「島辣椒」，第一年已經成功收成並產品化，正式創立自家品牌「超級島辣椒專賣店」。

全面暫停職業麻將清晨務農活出第二人生

如今嘅松岡千晶已經全面暫停職業麻將活動，徹底轉型為全職農夫。佢每日清晨5時起床打掃、7時落田耕作兼經營社交媒體，晚上10時準時入睡，過住同以前判若兩人嘅規律生活。而家佢返東京，多數係代表八丈島商工會青年部參加物產展，推廣自己親手種出嘅辣椒產品. 談到對東京嘅感覺，佢笑住話：「而家返去覺得每個人行路都好快，電車同大廈迫滿人，各種味道混雜，我始終鍾意八丈島充滿泥土同海風嘅氣息。」由牌桌女神到離島農夫，松岡用4年時間證明，人生從來唔止一條路。