去日本旅行，掃貨買手信是常識吧！尤其係東京車站，簡直係零食嘅激戰區，每次都花多眼亂。不過最近有樣甜品就成功突圍，有記者喺東京車站發現一支長達40cm嘅「巨型樹枝」，拎上手好似武器咁，造型超級誇張，即刻引起網上熱議，唔少人話要去朝聖打卡！

記者直擊40cm長朱古力棒真身勁震撼

事源有位日本記者行經東京車站一番街嘅菓子樂園（Tokyo Okashi Land），俾一間叫「森永のおかしなおかし屋さん」嘅舖頭門口嘅巨型廣告牌嚇親！廣告上竟然係一支長到唔合常理嘅朱古力棒。記者好奇心驅使下入去睇餐牌，發現普通版都有20cm長，賣360円，而加長版「Long Koeda Churro」更係長達40cm，盛惠650円！記者買完飛仔等咗一陣，店員一拎出嚟，佢當堂嚇到笑咗出聲，因為實物真係太有壓迫感，長到要用兩個紙袋包住頭尾先拎得穩，店員仲溫馨提示話「好易斷，要小心拎」，場面非常搞笑！

拎上手似上古神兵打卡呃like一流

事件曝光後，大批網民都話要去挑戰！事主拎住支40cm長嘅朱古力棒，喺人來人往嘅東京車站顯得格格不入，佢大呻感覺完全唔似拎住零食，反而似RPG遊戲主角拎住「傳說中嘅短劍」，充滿中二病感覺！佢將朱古力棒舉喺面前影相，畫面極度衝擊，唔少網民都話「呢個打卡呃like一流」、「拎去玩jousting都得」、「肯定即刻喺IG洗版」。呢種玩味十足嘅設計，完全擊中鍾意新奇事物嘅年輕人市場。

味道神還原經典零食期間限定隨時斷貨

正當大家以為呢支嘢只係Gimmick嘢，味道應該好普通之際，記者試食後竟然大讚有驚喜！佢話外層鋪滿杏仁同朱古力，完美還原咗日本經典零食「Koeda」（小枝）嘅香脆口感，入面嘅Churro麵糰亦都好夾。因為夠長，食落肚非常滿足，記者仲搞笑話食到一半，開始明白「河狸啃樹幹係咩感覺」。不過提提大家，呢款40cm長嘅「巨型樹枝」係期間限定兼數量限定，官方都未定幾時完，想去朝聖打卡嘅朋友真係要快手，如果唔係隨時會斷貨！