Krispy Kreme日本首推企鵝冬甩另一款食落竟然會「彈跳」

Krispy Kreme日本今個夏天玩大咗，推出品牌史上首款企鵝造型甜甜圈，仲有一款食落會「劈啪」彈跳嘅流冰主題冬甩，7月15日起限時限量開賣，識食嘅港人遊日大軍已經蠢蠢欲動。

企鵝卡士達冬甩首度登場內藏北海道牛奶餡

以「Cool Summer Lovin’」為主題，Krispy Kreme Japan一口氣發表兩款夏季限定新品。當中最矚目嘅「Penguin Custard’」係品牌歷來第一款企鵝造型甜甜圈，外層包裹住雲呢拿味藍色糖霜同牛奶白朱古力，再用苦味朱古力做出圓碌碌嘅眼睛，卡士達味糖霜砌成鳥嘴，造型極度打卡。咬開鬆軟麵團，內裡灌滿以北海道牛奶製成嘅濃郁卡士達忌廉，外帶價378日圓（約21港元）、內用385日圓，性價比相當高。

流冰白朱古力圈加入跳跳糖口感衝擊味蕾

另一款「Drift Ice White Chocolate Ring’」以陽光下閃爍嘅流冰為靈感，用品牌皇牌Original Glazed做底，外層裹上牛奶白朱古力，面頭再鋪滿透明糖晶粒增加脆口層次。最令人驚喜嘅係糖晶之間混入藍色朱古力碎粒，放入口會產生類似跳跳糖嘅「劈啪’」彈跳感，模擬咬碎冰塊嘅清涼體驗，外帶價291日圓（約16港元）、內用297日圓，比企鵝款更加親民。官方更建議將甜甜圈放入雪櫃冷藏後再食，涼浸浸口感即時升級。