去日本旅行，不少人都鍾意租架單車，喺恬靜嘅鄉郊小路或者繁華嘅城市街頭穿梭，夠晒寫意又方便！不過各位「單車友」要小心啦，以後喺日本踩單車隨時變「高危活動」！日本由4月1號起實施全新「青切符」（Blue Ticket）制度，針對14項單車違規行為發出告票，一唔小心隨時破財，最高罰款更達12,000円（約$650港元），遊客一樣冇情講，分分鐘開心遊日變「驚嚇之旅」！

盤點14大遊客最易中伏違規位隨時硬食天價罰款

今次新例打擊範圍極廣，好多港人習以為常嘅行為都變晒「違規陷阱」！罰款由3,000円至12,000円不等，真係睇到都心寒！最輕嘅3,000円（約$160）罰款包括情侶最愛嘅「二人同乘」同朋友並排踩車吹水。罰5,000円（約$270）嘅就有雨天擔遮、戴耳機聽歌、夜晚唔開燈呢啲「基本操作」。而最應棍嘅，就係踩車期間講電話或拎住部手機，一經發現即被票控12,000円（約$650），真係撳幾個掣就冇咗餐豐富晚餐！另外，喺行人路踩單車都係違規，要罰6,000円（約$325），雖然有豁免情況，但執法標準模糊，絕對係遊客最易中伏嘅位！

事件曝光後網民群組洗版大呻遊日樂趣大減

新例一出，即刻引爆各大旅遊群組洗版式討論！大批準備「返鄉下」嘅港人睇完都嚇親，紛紛大呻：「吓？戴耳機聽住歌踩車都唔得？咁咪好悶？」「同friend一齊踩，唔並排行點傾偈呀？」「最驚係行人路個位，條街咁窄，唔踩上行人路好危險喎，點知原來仲衰！」唔少網民鬧爆新例矯枉過正，令單車遊嘅樂趣大減，更有人擔心語言不通，萬一被警察截停都唔知點算，隨時「雞同鴨講」硬食告票，真係諗起都驚。

唔交罰款後果超嚴重隨時留案底影響入境

大家千祈唔好以為收告票事小，當局票控後嘅處理手法先係「戲肉」！根據新例，如果喺限期內乖乖去郵局或銀行交罰款，事件就會告一段落，唔會留低刑事紀錄。但如果抱住僥倖心態，諗住遊客身份可以走數，咁就大錯特錯！一旦逾期唔交罰款，日本警方有權將案件升級為刑事檢控程序，到時唔單止要上庭，一旦罪成更有可能留低案底，絕對會影響日後再入境日本，為咗慳幾百蚊搞到有手尾跟，真係喊都無謂！