去日本旅行，便利店掃貨絕對係指定動作！最近日本7-Eleven又出招，將兩款人氣甜食合體，推出一款前所未見的「混血餅乾」，一上架即引爆話題。重點係——呢款餅乾竟然係門市即場焗出嚟，241日圓就食到雙重口感，難怪日本網民已經急不及待要衝去搶購。

菠蘿麵包外皮撞上朱古力餅乾241円搞掂

日本7-Eleven旗下「Seven Cafe Bakery」系列，一向主打門市內設專用焗爐即場烘焙，今次再度出擊，於7月7日全國門市推出全新「現烤菠蘿麵包風味朱古力餅乾」。呢款新品最大賣點，係將菠蘿麵包（Melon Pan）招牌酥脆外皮嘅餅乾麵團，直接與朱古力餅乾融合，表面仲保留咗經典嘅格紋造型，加上糖粉經高溫焦糖化後呈現金黃色澤，賣相極之吸引.由於係店內即場新鮮出爐，官方強調口感係外層酥脆、內裡濃稠軟心，一口咬落去就能感受到雙重質感嘅強烈對比，售價僅241日圓（約13港元），性價比相當高！

網民群起激讚兩大人氣甜品合體太犯規

事件曝光後，大批網民替呢款新品瘋狂宣傳，紛紛表示「菠蘿麵包外皮本身已經係精華所在，再塞滿朱古力簡直犯規！」。事實上，Seven Cafe Bakery系列嘅現烤菠蘿麵包（售價161日圓）早喺兩年前推出時已經大受歡迎，一直係長賣長有嘅人氣商品，今次品牌將菠蘿麵包元素升級再混搭朱古力，被網民視為「神級操作」。不少人更表示，以往去7仔只係買飯糰同三文治，依家連甜品都可以食到現烤水準，完全顛覆對便利店嘅想像！

同場加映朱古力碎片曲奇一併登場

除咗菠蘿麵包風味朱古力餅乾之外，Seven Cafe Bakery同期仲有另一款人氣商品「現烤朱古力碎片曲奇」同步發售，鍾意朱古力嘅朋友可以一次過兩款掃齊。近期有計劃去日本旅行嘅朋友，記得將7-Eleven加入你嘅掃貨清單，7月7日起全國門市有售，想試新鮮出爐嘅滋味就要趁早，畢竟新品熱潮一過，想買都未必咁易搵到！