港女巴士車頭篤手機 一個搖晃竟被扣錢 司機反應令全車呆住

屯門公路落斜一搖手機「自動付款」司機當場呆住

事主於Threads發文分享經歷，指自己下班時登上一輛往屯門方向、已經迫到水洩不通的巴士，因車廂滿到頂閘，唯有企喺車頭八達通付款機前方位置. 巴士行駛期間，事主一路低頭篤手機，當巴士駛至屯門公路落斜路段時車身晃動，事主一時企唔穩身體向前傾，手中開啟感應支付功能的手機剛好觸碰到八達通機，即時完成扣款. 司機聽到「嘟」一聲後大為震驚，即刻追問事主點解要多畀一次錢，事主解釋係唔小心揩到，司機其後無再追究，但事主已經白白多付一程車資。

網民獻「神回覆」笑爆留言區逾兩萬人按讚

事件曝光後，大批網民睇到帖文笑到收唔到聲，紛紛獻出各種幽默回應建議事主用嚟化解尷尬。其中一句「冇，見你揸得幾好，想打賞下你」獲逾兩萬人按讚，被封為「Threads界周星馳」。其他網民亦接力創作，「答：因為你靚仔」、「我畀埋聽日嗰轉」、「我有錢冇埞使」等回覆令留言區變成大型棟篤笑現場。亦有人抵死形容企位要畀兩次錢好合理，「同演唱會一樣，企位係貴啲，配合車頭超開揚視野」，將事主嘅損失昇華成一場全民娛樂。

前車長揭「誤嘟」屬頂閘日常有人試過被扣$44

有前巴士車長現身留言區指出，呢類「誤嘟」情況喺車廂頂閘時其實屬日常現象，「間唔中會有人將隻手錶、掛住嘅八達通或手機隊咗去個八達通機度，嘟多次錢，身為車長都做唔到啲乜嘢」。更有巴士公司員工分享自身經歷，指自己企喺司機門隔籬時因巴士收油向前衝，電話掂到八達通機即時被扣$44，同事知道後笑到停唔到。有現職車長透露，每次見到有乘客企喺八達通機位就會熄咗部機以防誤嘟。網民亦提供實用建議，指可以記錄拍卡時間同路線，再聯絡巴士公司客服申請退款，又建議設定Face ID認證先至可以付款，避免同類事件再發生。