小巴司機頭頂放水樽轉彎竟滴水不漏｜網民封車神但另一宗片就嚇親人

乘客拍片揭司機頭頂藏水樽轉彎搖晃竟滴水不漏

有女乘客近日搭小巴時，發現司機座位頭頂冷氣出風口旁邊，擺放咗一個切開嘅水樽頭，入面裝住清水。佢覺得好奇即刻拍片放上Threads問網民：「放杯水上頭頂有咩用？揸揸下車淋自己？」影片清楚見到小巴行車期間經過彎位，水樽明顯左右搖擺，但裏面嘅清水竟然完全無灑出嚟，司機行車速度唔算快但轉向動作明顯，水面紋絲不動嘅畫面令網民嘖嘖稱奇。

網民即封小巴界藤原拓海笑稱寶刀未老

事件曝光後，大批網民即時聯想到經典電影《頭文字D》主角藤原拓海練車技嘅情節，紛紛留言封司機做「傳說中嘅藤原小巴」。有人笑言「估唔到畀你坐到！杯水未瀉，睇嚟佢寶刀未老」、「應該係佢老竇叫佢咁做，目的係揸穩部車，小心甩尾」，更有人話「冇咗呢杯嘢做限制器，你一早變咗爛豆腐」、「冇呢杯水，假設平時車程20分鐘，冇咗佢應該變5分鐘」。不過亦有網民提出實際解釋，指Coaster小巴冷氣機喺司機位頂，出風口容易滴水，水樽其實係用嚟接住冷氣機漏出嘅冷凝水，「你眼見佢都去咗一半，冷氣機滴水呢家嘢好快就滿」。

何文田另一小巴逆線直行被車響長咹仍繼續前駛目擊者已舉報

同期另一宗小巴事件就令人笑唔出。有目擊者喺Threads上載車Cam片段，顯示一輛開往旺角嘅紅色19座載客小巴，喺何文田亞皆老街雅麗居對出路段逆線行車。現場共有3條行車線，涉事小巴竟然喺中線逆線行駛，同一車道嘅司機見狀即刻停低唔敢向前，左右兩線車輛亦慢駛避開. 其他駕駛者不斷響長咹提醒，但該小巴女司機仍然繼續向前直行。目擊者車上有男聲留意到司機疑似係年長女性，樓主形容當下「真係好得人驚」，質疑對方「其實係知自己行錯，但仲一路直行」。網民狠批司機係馬路炸彈，「咁樣都可以揸小巴」、「如我在小巴上，一定大叫停車有落」。目擊者表示已就事件向1823舉報。