狗主替愛犬沖涼洗到一半突然「斷電」 狂拍狂搖都冇反應結局神反轉

來福沖涼沖到一半突然「斷電」紋風不動

影片可見，婦人正認真替來福搓洗全身，狗狗渾身沾滿泡泡，場面本來相當溫馨。點知洗到中途，來福突然好似被人撳咗暫停掣一樣，整隻狗躺喺原地一動不動，雙眼緊閉，完全冇任何動靜。婦人起初以為來福只係洗得太舒服瞌眼瞓，但無論點樣叫佢名、摸佢身體，狗狗都完全冇反應。婦人愈嚟愈慌張，不斷拍打來福肚皮、搖晃佢身體，連聲呼喊「來福！來福！」，期間更忍唔住驚呼：「完了，死了嗎？」場面一度極度緊張，隔住屏幕都替婦人捏一把汗。

事件曝光後大批網民被嚇親紛紛留言

影片喺網上流傳後，大批網民睇到前半段都替婦人擔心不已，紛紛留言表示「嚇死我了，我都以為真係出事」、「睇到心都離一離」。不少同為狗主嘅網民深有同感，直言自家毛孩沖涼時都試過類似情況，每次都會嚇到手軟腳軟。有網民笑稱來福堪稱「狗界睡神」，亦有人形容佢「舒服到直接斷電」，認為呢段影片係狗狗洗澡放鬆到極致嘅最佳示範。

來福慢慢睜眼望住主人表情超級無辜

正當婦人幾乎被嚇壞之際，戲劇性一幕突然出現。只見來福慢慢睜開雙眼，一臉睡眼惺忪咁望住主人，表情迷糊又無辜，彷彿喺講：「洗好未？做咩咁嘈？」原來來福只係因為溫水沖洗加上刷毛按摩太過舒服，直接進入深度睡眠狀態. 婦人虛驚一場，事後哭笑不得，直言差啲被來福嚇到魂都飛埋。有網民解釋，部分狗隻喺溫水沖洗及按摩時，的確有可能因為太放鬆而進入熟睡狀態，來福正正就係呢個情況，令婦人白白擔驚受怕一場。