想自己嘅毛孩可以活潑開朗，識多啲朋友仔，相信係唔少主人嘅心願。最近國外就有一位主人，滿心歡喜帶自己只得16周大嘅臘腸狗BB去上寵物社交班，點知好心做壞事，狗狗全程「社恐」發作，一系列超無助嘅爆笑舉動，引嚟超過600萬人次瘋狂圍觀！

主人好心做壞事16周大臘腸狗上堂全程龜縮

事源係一位女主人「@weeniexmom」想訓練家中16周大嘅臘腸犬Cookie，等佢可以社會化啲，於是就帶佢去上幼犬社交課程。呢啲課程原意係透過正向訓練，幫幼犬適應外界，建立自信。點知Cookie一入到課室就完全唔對路，唔單止冇同其他狗狗玩，仲即刻一支箭咁衝去角落，全程龜縮，甚至將個頭仔塞入圍欄罅隙，用極度無助嘅眼神向主人瘋狂求救，個樣慘到令人又心痛又好笑！當有其他熱情嘅狗狗想埋嚟打招呼，Cookie仲嚇到即刻退後，最後索性縮埋喺訓練員懷中尋求安慰，場面非常尷尬。

影片曝光引發網民洗版有人心痛有人鬧爆

事件影片在網上曝光後，Cookie嘅「社恐」實錄隨即引發網民洗版式討論！大批網民都被Cookie嘅反應笑爆，紛紛留言幫佢配音：「救命呀！呢度有好多狗呀！」、「快啲帶我走，我想返屋企！」、「完全明白佢感受，我就係咁樣」。不過，亦有另一批網民鬧爆主人做法，認為佢根本冇必要強逼一隻明顯感到驚慌嘅幼犬去上堂，「睇到佢個樣都心痛」、「咁細個就要面對社交壓力，太慘了」、「根本係滿足主人自己」。

主人親自回應爭議直言日後或不再上堂

面對網上兩極嘅評論，主人「@weeniexmom」都始料未及，佢親自回應表示：「無諗過段片會引起咁大迴響，多謝大家嘅建議」。佢解釋當初只係想為狗狗好，但見到Cookie咁抗拒，都覺得好心痛。經過今次「震撼教育」，佢大呻日後可能都唔會再帶Cookie去上類似嘅課程，睇嚟呢次嘅社交初體驗，真係留低咗唔少陰影面積呀！