雪櫃生肉不翼而飛！女主人裝Cam緝兇驚見「4大盜」集團式犯案！網民：主謀好明顯！

屋企啲嘢食無端端唔見咗？除咗要懷疑屋企人偷食，各位貓奴狗主都要小心屋企嘅「毛神偷」！最近外國有位女主人就發現，雪櫃準備解凍嘅生肉竟然次次都離奇失蹤，忍無可忍之下決定裝Cam緝兇，點知一睇片，竟然發現兇手唔止一個，而係一個由4隻貓貓組成嘅「犯罪集團」，犯案過程全被直擊！

4貓組團集團式犯案

從女主人公開嘅影片所見，呢個「毛孩神偷團」分工極之清晰！由一隻黑白貓做「大佬」帶頭，身手敏捷咁爬上雪櫃門嘅把手，再用前腳仔嘗試拉開雪櫃門；而另外三隻貓貓就喺下面乖乖「睇水」，全程緊張咁望實大佬嘅一舉一動，好似隨時準備衝入去大快朵頤咁，成個佈局根本係專業級數！

網民洗版笑爆似PetPet當家

事件曝光後，影片喺TikTok極速瘋傳，累積超過1,200萬次點擊，大批網民替事主哭笑不得之餘，更引發洗版式討論！唔少網民都笑爆，話呢班貓貓根本係「組織性犯罪」，仲話「黑白嗰隻一睇就知係主謀啦！」、「呢啲係慣犯嚟」、「成班衰鬼為咗食可以去到幾盡？」，更有眼利網民話成個畫面根本就係動畫《Pet Pet當家》嘅真人版，可愛到令人嬲唔落！