俗語有話「養兒防老」，但如果父母將親情關係都用金錢計算，又會係點嘅局面？最近日本有單熱話，一名79歲阿伯坐擁超過1億日圓（約492萬港元）身家，但竟然因為孤寒到出汁，連個仔返屋企照顧佢都要「明碼實價」收錢，結果搞到父子關係徹底破裂，晚年生活超孤獨，真係睇見都心酸！

孤寒阿爸計到盡！照顧3日竟要收足9萬円照護費

事件主角係79歲嘅田島先生（化名），佢後生時事業有成，加上投資有道同繼承遺產，退休後手持超過1億日圓資產，絕對係人生勝利組。不過自從老婆5年前過身後，佢對金錢嘅執著變本加厲。早前佢喺屋企跌親，孝順仔專登請假3日返屋企貼身照顧。點知個仔臨走嗰陣，阿爸竟然遞上一個信封，入面唔係利是，而係一張寫住「照護費3萬日圓×3日」嘅字條，仲理直氣壯話「雖然將來有遺產，但在我活著的時候，這些錢都是我的」，強調父子都要明算帳，總共要收返9萬円（約$1474港元）！呢個舉動簡直當個仔係外人，令孝順仔當場心碎。

事件曝光後網民群起公審！一面倒鬧爆阿伯做法太心寒

呢單家庭倫理慘劇喺網上曝光後，即刻引發群組洗版，大批網民替事主個仔唔抵！唔少人鬧爆阿伯「有錢冇人性」、「孤寒到冇朋友」，認為佢嘅做法完全係將親情當交易，「個仔返嚟照顧你係出於孝心，唔係為咗你啲錢，咁樣做同摑佢一巴有咩分別？」、「坐擁$492萬又點？連個仔都冇埋，晚年攬住啲錢過世囉！」更有網民力撐個仔應該即刻斷絕關係，「呢啲親情唔要都罷啦，快啲走唔好再返轉頭！」

孝順仔心死寄信正式決裂！專家拆解守財奴悲劇晚年

面對阿爸嘅無情對待，長子最終徹底心寒。幾日後，佢寄出一封信，向阿爸表明自己對遺產毫無興趣，並正式提出斷絕關係，要求對方「自行保管財產」。自此，父子關係決裂，田島先生雖然坐擁巨額資產，卻只能孤獨一人度過晚年。有專家分析，唔少老人家對金錢有強烈執著，可能源於退休後嘅不安全感同孤獨感，將金錢視為唯一依靠。但田島先生嘅悲劇正正提醒大家，過度守財最終只會犧牲更重要嘅人際關係，贏咗金錢，卻輸晒成個家庭，絕對係得不償失。