17歲少女為賺學費踩入「陰宅」界！靠1招變家族CEO 結局竟搵返失散祖先？

17歲少女為賺學費踩入陰宅界！靠1招變身家族CEO月接75張單

事主蘇蘭德里早喺2年前、即17歲時，為咗唔想父母為佢嘅護理系學費操心，決心靠自己賺錢。佢留意到當地好多墓園日久失修，唔少墓碑被雜草同泥土淹沒，於是靈機一觸，決定膽粗粗開展「代客掃墓」服務。佢喺父母支持下，透過Facebook登廣告，點知短短1個月就訂單接到手軟！而家佢已經有約75個「固定客戶」，每個月會幫每個墓地清理兩次，除咗基本清潔，仲會影相拍片畀遠在他鄉、無法親自祭祖嘅家屬，等佢哋可以安心，服務超貼心！

事件曝光後網民激讚似墓園偵探！更揭男友慘變免費苦工笑爆網絡

事件曝光後，大批網民替事主嘅孝心同生意頭腦所折服，仲大讚佢哋嘅工作好似「墓園偵探」！事關好多客人都只係畀到「大樹隔離、最後一排」呢啲超模糊嘅指示，加上墓園幾十年後地貌大變，搵個墓都勁有難度。而呢盤生意亦由佢一人兼職，演變成全家總動員嘅「家族企業」，爸爸負責採購、媽媽管數，連外婆同男友都喺週末嚟幫手。不過事主就笑言：「可惜我根本冇畀薪水佢哋。」男友慘變免費苦工嘅事實，更係笑爆一眾網民！

天大巧合幫客掃墓竟搵返祖先！全家重逢結局超展開勁過電影

最神奇嘅係，呢份工竟然帶嚟一個電影級嘅奇遇！喺2025年，事主媽媽幫客人搵墓時，無意中發現一個刻有家族姓氏嘅古老墓碑。一家人返去翻查族譜先驚覺，墓碑主人竟然係佢哋素未謀面、失散多年嘅曾祖父母！多年嚟全家都唔知祖先葬喺邊，估唔到竟然因為幫人掃墓而意外「重逢」，全家都直呼不可思議。呢個超展開結局，唔單止令少女賺夠學費，更意外地幫整個家族搵返失落已久嘅根，意義重大！