人間悲劇！朋友之間嘅妒忌心可以去到幾盡？墨西哥近日一單駭人聽聞嘅兇案震驚全球，一名15歲少女應約見閨密，滿心歡喜以為有「驚喜」，點知竟然係一場精心策劃嘅死亡陷阱！更令人心寒嘅係，兩名未成年兇手行兇過程全程拍片，事後更只係被輕判，賠償金額少到連喪葬費一半都唔夠，事件引起社會強烈憤慨，唔少人都替死者一家感到不值！

少女赴約慘遭閨密綑綁殺害行兇過程更被全程拍下

事發喺墨西哥索諾拉州，15歲少女萊拉（Leyla）去年被兩名分別13歲同15歲嘅「好朋友」約出嚟，對方聲稱要介紹男仔俾佢識，仲話有「驚喜」！萊拉不虞有詐，去到現場仲笑住問要見邊個，點知對方竟然叫佢蒙眼坐低。下一秒，兩名冷血閨密就用繩將佢綁喺櫈上，活活將佢勒死！據報，佢哋事前曾因口角同妒忌而鬧翻，兇手更全程用手機拍低行兇過程，影片事後更喺網上瘋傳，手段極之殘忍！

殺人影片數月後瘋傳網民睇到心寒鬧爆兇手冷血無良

事件曝光後，大批網民替事主不值，喺各大社交平台洗版式鬧爆兩名兇手！殺人影片喺事發幾個月後先流到死者媽媽手上，佢心碎控訴：「證據就係條片，記錄咗佢哋點樣攞走我個女條命！」影片中見到兇手行兇後，仲毀壞屍體、撒上石灰再埋屍，行為令人髮指。網民紛紛留言「13、15歲就咁惡毒，大個咗點算？」、「呢啲根本就係惡魔！」、「睇到手都震埋，點可以對朋友做到咁！」，怒斥兇手冷血無良，完全無人性！

法庭輕判2年監禁賠償金不足喪葬費一半家屬誓要討回公道

最令社會嘩然嘅係，案件喺今年3月審結，法庭嘅判決結果簡直係匪夷所思！15歲嘅兇手只係被判監2年10個月，而13歲嘅兇手更只係需要接受11個月監管！兩人需要共同支付嘅賠償金僅僅約$2551港元，連死者一半嘅喪葬費都唔夠！由於遺體被嚴重破壞，家人連最後一面都見唔到，只能對住密封嘅棺木告別。呢個判決令死者家屬同社會大眾都無法接受，死者媽媽誓言會繼續為愛女討回公道，並希望喚起社會對青少年暴力問題嘅關注。