啟德體育園園區「啟德零售館」日前舉行免費派雪糕活動，因反應熱烈需暫停補貨約1小時，竟惹來數名男女圍堵職員破口大罵。面對無理指罵，現場職員全程冷靜應對，結果影片在網上瘋傳後輿論完全逆轉。

免費雪糕派到斷貨顧客圍罵職員嫌等太耐

事件發生於7月8日，雪糕品牌Dreyer’s在啟德零售館舉行免費派發全新口味雪糕活動。由於現場反應熱烈，雪糕數量不足需要暫停派發約1小時等候補貨。期間數名男女顧客圍堵在圍欄外向職員問責，女職員耐心解釋「呢個係我哋因應現場情況」，男職員亦清楚交代補貨時間為「1點半到2點半」，2點半後會繼續派發至6點。然而顧客完全不接受解釋，強調「要返工」沒時間等. 男職員詢問「你哋係咪唔得閒？」眾人即齊聲大喝「梗係唔得閒啦！」女職員隨即提出折衷方案，建議他們先完成在Instagram發布限時動態的程序，有雪糕時會優先派發，惟其中一名女子仍然不收貨，反嗆「我都未攞雪糕，POST咩STORY啫？」

事件曝光後網民群起公審斥貪小便宜仲惡過人

事件影片在社交平台Threads瘋傳後，大批網民替職員不值，紛紛讚賞幾位Dreyer’s員工全程保持專業態度，「職員EQ好」、「辛苦幾位職員，對住啲咁嘅客都仲幾好態度」。有親身到場領取雪糕的網民亦留言力撐，指現場只得一個雪糕櫃而非大型凍貨櫃，職員更有幫助長者完成社交媒體程序，態度相當友善。與此同時，大批網民鬧爆涉事男女是「極品西客」，斥責「貪小便宜仲喺度嘈嘈嘈，話唔等得，一陣唔得閒，咁你咪唔好攞，畀錢自己買囉」、「冇畀錢都咁惡大晒嘅款」、「派係免費，唔係欠咗你」，更有人直言「咩世界？影衰香港人！！」

職員高EQ處理獲一面倒讚好西客反成全網笑柄

事件最終以職員的專業態度贏得全場尊重作結。網民一面倒將矛頭指向涉事顧客，認為免費活動本身屬品牌好意，補貨屬正常安排，根本無需對前線員工發難。有做過服務業的網民感嘆「成堆人攞免費嘢仲好似欠咗佢咁，攞唔到就發癲」，亦有人形容涉事男女「肉酸到」，為貪一杯免費雪糕卻賠上尊嚴，淪為全網公審對象。幾位Dreyer’s職員的冷靜與耐心，反而成為事件中最大贏家。