打工仔日日做到隻積咁，最想就係有朝一日可以財務自由，唔再睇老闆面色！最近外國就有個29歲工程師，真人示範咩叫「知識改變命運」，佢本身讀化學工程出身，靠自學寫Code，最後竟然只係用咗14日時間，就開發出一隻爆款AI工具，產品上線短短6個星期，月入就已經高達5萬美金（約39萬港元），實現咗唔少人夢寐以求嘅打工仔逆襲！

29歲仔閉關14日神操作靠AI寫Code勁賺第一桶金

呢位逆襲主角名叫Vitalii Dodonov，佢嘅創業路絕對係一個傳奇。佢大學本身讀嘅係同電腦完全無關嘅化學工程，但因為覺得實驗室工作太過沉悶重複，就開始自學編程。畢業後憑住呢門手藝，先後做過Deloitte數據科學家同eBay高級軟件工程師。但真正嘅轉捩點，係佢同共同創辦人特登飛去倫敦，將自己鎖喺公寓14日，全力開發新嘅AI產品「Stanley」。最神奇嘅係，Vitalii話自己「一行程式碼都冇寫過」，全程只係向AI描述自己想要嘅功能，再由AI自動生成，呢種「Vibe Coding」模式，令佢哋極速打造出一個功能齊全嘅工具！

產品上線6星期月入39萬港元全平台年收狂賺3.1億

事件曝光後，成個AI創業圈都為之震驚！呢款名叫「Stanley」嘅AI工具，主打幫內容創作者經營社交平台，推出第一日就已經吸引到250個付費用戶，絕對係一鳴驚人。數據更加係嚇親人，產品上線短短6個星期，每月經常性收入（MRR）就已經衝破5萬美元（約39萬港元）。而家Stanley嘅全年經常性收入（ARR）更加已經達到300萬美元（約2350萬港元），帶挈佢哋成個「Stan」平台嘅年營收接近4000萬美元（約3.1億港元），吸金能力極度驚人！

創辦人豪言以後不再幫人打工誓要打造傳奇跨世代公司

賺到第一桶金之後，Vitalii並冇停低腳步。佢認為而家係一個由AI賦能個人嘅時代，只要肯努力同逆向思考，一個人都可以做到以前成間公司先有嘅能力。佢嘅目標係要打造一間可以傳承幾代、引領世界未來三、四十年嘅公司。至於會唔會再返去打工？佢就笑住坦言可能性極低，仲霸氣咁講：「我感覺自己以後都唔會再替別人工作了。」呢份決心同成就，真係羨慕死唔少日日逼地鐵返工嘅打工仔！