高鐵安檢被截！因一樽開封名酒 男子竟當場「吹喇叭」3分鐘飲清光

事主唔忿氣掉名酒 3分鐘吹喇叭飲清光

事發喺日前嘅重慶高鐵站，一名男子帶住一樽已經開封嘅茅台酒準備過安檢，隨即被工作人員截停。職員解釋，根據鐵路部門規定，已開封嘅酒類因為有洩漏等安全隱患，一律禁止攜帶進站。雖然旅客可以帶包裝完好嘅酒，但呢位事主手上嘅茅台明顯唔符合規定。眼見心愛嘅名酒隨時要「倒落坑渠」，事主心有不甘，竟然決定「路邊解決」！佢索性喺安檢口旁邊，當場打開樽蓋，喺短短3分鐘內將整樽茅台一飲而盡，飲完後仲要若無其事咁通過安檢，順利登上高鐵，盡顯「真漢子」本色！

驚人後續曝光！妻子大爆丈夫千杯不醉落車直落第二場

事件片段曝光後，隨即引發網民熱議，唔少人都好奇事主飲完成樽烈酒後嘅狀況。事後，男子嘅妻子鍾女士接受訪問時就大爆驚人後續！佢話丈夫平日酒量確實相當唔錯，當日飲完成樽茅台都只係「有點微醺」，喺車站同乘車期間完全冇任何失態或者鬧事行為。更誇張嘅係，丈夫抵達目的地後，竟然仲可以即刻同朋友會合，繼續「下半場」飲酒聚會，酒量驚人！鍾女士亦笑言，經此一役，下次出門前一定會查清楚鐵路禁帶物品規定，費事再發生同樣嘅尷尬情況。

官方提醒旅客注意 高鐵禁帶物品清單一覽

雖然今次事件主角最終有驚無險，但鐵路部門都特別提醒旅客，高鐵嘅行李限制比較嚴格，大家出發前最好做足功課。除咗已開封嘅酒類，酒精濃度超過70%嘅烈酒、防曬噴霧等易燃噴霧，以及超出容量限制嘅香水等，都屬於禁帶或限帶物品。旅客出發前可以透過鐵路「12306」手機應用程式查詢相關規定，咁就唔怕因為帶錯嘢而影響行程，搞到要當場「吹喇叭」咁狼狽啦！