近期韓國有間Cafe喺社交平台一夜爆紅，事關有食客分享一張超震撼甜品相，相中嘅「暴龍頭骨化石」像真度極高，無論係骨骼紋理定顏色都同真嘅化石無異，令唔少人初時以為係博物館展品！帖文一出即刻引起瘋傳，唔少網民都話睇到嚇一跳，好奇呢件「藝術品」到底係咩嚟頭，點知真相竟然係一件食得落肚嘅Tiramisu！

甜品竟是暴龍頭骨化石？超逼真造型呃過2000萬人眼球

呢間位於南韓京畿道水原市嘅「Rexpresso Museum」咖啡廳，憑住呢款「暴龍頭骨提拉米蘇」成功跑出，相關帖文喺網上累積瀏覽次數已突破2000萬！據了解，呢款甜品係由糕點師傅將原塊朱古力磚，精心雕刻成暴龍頭骨化石嘅樣，像真度高到連考古愛好者都大讚。除咗呢款爆紅甜品，店內仲有其他結合考古概念嘅糕點，顧客要用小鏟子慢慢「挖掘」，先可以搵到隱藏喺入面嘅小化石，玩味十足！

網民洗版式朝聖！直擊店內巨型化石宛如置身博物館

事件曝光後，大批網民都話要去朝聖，更發現呢間Cafe根本係一間小型恐龍博物館！一踏入店內，就會見到一尊超巨型嘅暴龍化石企喺正中央，氣勢磅礴，令人瞬間以為自己去錯地方。更誇張嘅係，店內仲飼養咗多達200隻爬蟲類動物，仲有一位有超過10年經驗嘅動物專家駐場講解，等大家可以近距離接觸呢啲小動物，難怪網民會洗版式激讚「體驗感一流」！

店主原來是資深恐龍迷！溫馨提示展品全部禁止觸摸

原來，呢間Cafe嘅創辦人本身就係一位資深恐龍迷，店內所有展品都係佢嘅私人珍藏！好似鎮店之寶嘅巨型暴龍化石，就係店主特登由海外購入，同荷蘭自然歷史博物館展出嘅暴龍化石「Trix」屬於同款。另外，暴龍牙齒、速龍蛋等化石亦全部都係真品。所以店方亦特別提醒，雖然歡迎小朋友入場，但家長要睇實，絕對唔可以亂入非開放區域，而且所有展品都係禁止觸摸㗎！