馬路上面捉醉駕就見得多，估唔到連划龍舟都要「吹波波」？近日內地瘋傳一段影片，見到一班龍舟大隻佬竟然要排住隊接受酒精測試，奇景令全網O嘴，唔通真係有「醉扒」呢回事？
長沙交警河邊執法龍舟隊員排隊酒測
事發喺湖南長沙，從網上瘋傳嘅影片可見，一班準備落水訓練嘅龍舟隊隊員，竟然唔係做熱身，而係喺河邊排排企，逐個接受交警嘅酒精呼氣測試。呢個畫面即時引爆網絡，唔少人都大感驚訝，紛紛留言問：「划龍舟都要吹酒測？」、「水上都有交通警？」，事件迅速成為熱話。
網民睇到O晒嘴質疑做法史無前例
事件曝光後，大批網民替隊員感到不解，認為交警做法係多此一舉。唔少人喺討論區洗版，指出現行法例中嘅「酒駕」，一般只係針對道路上嘅汽車司機，從未聽過連划船都要管，「個海咁闊點樣醉駕」、「係咪划得太快要抄牌」，質疑聲音此起彼落。
官方解畫揭驚人後果網民態度180度轉變
正當大家議論紛紛之際，管理單位終於出面解畫，令風向出現180度轉變！官方解釋，雖然划龍舟唔受道路交通條例規管，但各地龍舟賽事規定都嚴禁酒後落水。因為龍舟係講求合作同判斷力嘅運動，飲酒後反應變慢，隨時影響全船人，嚴重起上嚟更可能導致翻船落水嘅致命意外！聽完解釋後，網民即刻轉軚，由質疑變為力撐，大讚「安全第一，支持檢查」，認為呢個措施絕對有必要，以免端午節樂極生悲。
