銀行服務幾時變到咁離譜？近日印度一單駭人聽聞嘅事件喺網上瘋傳，一名男子為咗領取亡姊戶口僅僅約$1600港元嘅遺產，竟然被銀行職員以「需本人到場」為由多番刁難。事主在求助無門、瀕臨崩潰之下，竟然做出咗一個令所有人都意想唔到嘅舉動，將「本人」親身帶到銀行櫃檯，場面極度震撼！

為拎$1600遺產竟被要求死者現身 事主絕望下徒步3公里出奇招

事主吉圖（Jitu Munda）嘅家姐喺兩個月前不幸離世，由於姐夫同外甥都已經先行一步，佢就成為亡姊筆錢唯一嘅合法繼承人。點知佢去銀行想拎返戶口入面僅有嘅19,300盧比（約$1600港元）存款時，銀行職員竟然死守規矩，堅持要「帳戶持有人必須親身到場」，或者要佢提交一大堆佢根本唔識搞嘅法定繼承文件。喺多次食閉門羹之後，絕望嘅吉圖竟然喺4月27日去火葬場，親手挖出家姐嘅遺骸，用布包好，再頂住烈日徒步3公里，就係為咗將「本人」帶到銀行，向冷血嘅制度作出最沉重嘅控訴！

骸骨驚現銀行大堂嚇窒全場 村民鬧爆銀行處理手法毫無人性

事件曝光後，大批網民替事主不值，而事發當時嘅情況更加係令人心酸。當吉圖將亡姊嘅遺骸帶入銀行大堂時，在場所有職員同客人都被眼前一幕嚇到呆咗，有目擊者當場忍唔住落淚，亦有村民睇唔過眼，即場大聲質問點解窮人想拎返屬於自己嘅錢會咁困難！當地村民群起聲援事主，鬧爆銀行處理手法完全冇考慮過事主嘅實際處境，只係死板咁跟程序辦事，批評銀行只要派人去村里問下村長，或者實地查訪一下，就可以證實死亡事實，根本唔使搞到今時今日咁嘅地步，直斥銀行「毫無同理心」。

警方介入事件終現曙光 銀行被勒令解釋冷血處理流程

呢場荒誕嘅鬧劇最終要由警方介入先告一段落。警員到場後，先安撫吉圖激動嘅情緒，並承諾會從人道角度出發，協助佢處理提款事宜，總算為事件帶來一線曙光。同時，警方已經正式要求涉事銀行，必須就今次事件嘅處理流程作出合理解釋。事件亦引發外界極大迴響，令人關注喺僵化嘅行政制度下，基層市民所面對嘅無助同困境，希望唔會再有下一個「吉圖」出現。