酒店驚魂！凌晨3點半男友叫醒我「你身邊有個人」 睜眼嚇呆：陌生男同床共枕！

事主凌晨3點半被男友叫醒 驚見陌生醉漢同床共枕

事主喺網上詳細憶述恐怖經過，指當晚佢同男友入住酒店嘅雙床房，兩人各睡一張床。到咗凌晨3點半，佢喺熟睡中被男友叫醒，男友劈頭第一句就話佢身邊有個人！事主擘大眼一睇，赫然發現一個完全唔識嘅男人正正就瞓喺自己張床上面，當場嚇到魂飛魄散！佢哋即刻報警同聯絡酒店前台，經調查後先知，原來呢名陌生男子係酒店另一間房嘅住客，因為飲醉酒，誤打誤撞走錯房，仲直接推門入嚟瞓低咗。

酒店零道歉反指事主無鎖門 網民鬧爆：受害者有罪論？

事件曝光後，大批網民替事主不值，但酒店嘅處理手法更令事主嬲到震！事主怒訴，酒店保安形同虛設，房門完全無用，但酒店方面唔單止無任何道歉同賠償，仲話唔怕任何投訴。酒店職員更理直氣壯反駁，指事主自己「有防盜鏈她沒上，也並沒有鎖住門」，仲話閉路電視影到該名醉漢「推門進入時並沒有刷卡的動作」。言論一出即刻引爆網民怒火，群組洗版鬧爆：「又嚟受害者有罪論了，個門就不應該是能被其他人打開的狀態」、「住酒店你都唔鎖門？」、「男朋友先醒咗唔搞個男人，仲叫醒女朋友畀佢睇，我都驚咗」，亦有網民錯重點，質疑男友嘅反應太奇怪。

事件羅生門結局反轉 醉漢賠錢私了酒店企硬唔賠

雖然事主同酒店就責任問題各執一詞，但事件最終都有個了斷。事主透露，由於該名醉酒男子「態度良好且並非惡意」，佢哋最後選擇私下和解，對方亦有作出賠償，但具體金額就未有公開。換言之，醉漢承認自己過失並負責，但酒店方面就由始至終企硬，認為係事主無鎖好門在先，拒絕承擔任何責任同賠償。呢個結局令唔少網民大感不忿，認為酒店明顯有保安漏洞，竟然可以將責任推得一乾二淨。