養兒防老，從來都係唔少父母嘅心願，但如果傾盡所有，換嚟嘅只係仔女一句無情嘅說話，又情何以堪？最近日本就有一位媽媽大呻，自己過去21年節衣縮食，豪擲超過120萬港元血汗錢，一心栽培個仔入名牌大學，點知個仔一出嚟做嘢就即刻搬走兼疏遠佢，一句「放過我吧」更令佢當場心碎，21年心血瞬間付諸流水！

豪擲2307萬栽培成材反被無情拋棄

根據日媒報導，呢位56歲嘅日本媽媽友美，為咗鋪好個仔嘅升學路，由細到大嘅補習班到大學選校都親力親為。佢為咗儲夠教育經費，21年嚟死慳死抵，甚至要打多份工幫補，總共豪擲咗成2307萬日圓（約120萬港元）！原以為個仔入到東京名校、順利畢業搵到工，就係幸福家庭嘅開始，點知惡夢先啱啱降臨。個仔一踏入社會就即刻搬出去住，訊息長期「已讀不回」。友美忍唔住上門關心，點知一入屋就忍唔住指責個仔嘅生活方式，仲想勸佢搬返屋企住，結果引爆衝突，個仔決絕反擊：「放過我吧！去過妳自己的生活吧，我不會再回去了。」

慘食檸檬患空巢期症候群反思人生

將成個人生押喺個仔身上嘅友美，聽到呢番話當場崩潰，陷入嚴重嘅自我懷疑，不斷質問「沒有我，你能有今天嗎？」，感覺就好似被全世界拋棄。呢種強烈嘅失落感，正正係典型嘅「空巢期症候群」。好多家長將仔女視為人生唯一重心，當仔女離家獨立，先發現自己除咗「父母」呢個身份之外，生活一片空白，長年累月自我犧牲所積壓嘅心理落差，喺呢一刻一次過爆發，令人心酸。

專家拆解親子關係籲家長學識放手

事件曝光後，有專家就呢種家庭悲劇作出分析。專家指出，父母關心仔女係天性，但過度介入同操控佢哋嘅學業同生活，反而會令仔女產生巨大壓力，一心只想逃避。專家提醒，學識「放手」嘅難度，絕對唔比「養育」低。父母需要逐步將生活重心由仔女身上轉移返去自己度，重新培養個人興趣，並且同仔女之間建立返一個健康、有適當距離感嘅關係，咁樣先至可以令親子關係行得更長遠、更健康。