湖南街頭MMA｜男騎手慘遭大媽當街扯甩褲！光頭保安1個反應惹公憤

大媽倒地出絕招當街扯甩騎手褲

事發在湖南婁底一個商業街廣場，從網上瘋傳嘅影片可見，一名戴住頭盔嘅男騎手，同另一名中年婦人唔知因為咩事爆發激烈爭執，之後更演變成肢體混戰。期間，該名婦人突然使出「絕招」，成個人瞓喺地下，雙手死命拉扯男騎手嘅褲。最終，男騎手不敵對方嘅蠻力，成條褲被當眾扯甩，下身光脫脫，場面極度尷尬混亂！

影片瘋傳網民洗版鬧爆點解冇人幫手

事件曝光後，相關影片即時喺網上被瘋傳，大批網民睇到眼都凸埋，隨即群組洗版！好多人都替男事主感到不值，認為即使有爭執，婦人嘅行為都實在太過火，完全係侮辱。更多網民鬧爆點解現場咁多途人圍觀，竟然冇人即時上前制止，就咁眼白白睇住鬧劇上演，實在太冷漠。

保安被指掛住食花生全程笑笑口袖手旁觀

不過，最令網民嬲爆嘅，係片中一名身穿制服嘅光頭保安！佢由頭到尾企喺衝突現場旁邊，唔單止冇履行職責上前介入調停，更被指疑似一路笑笑口「食花生」，完全袖手旁觀，離譜行徑惹起公憤。目前，事件嘅起因同雙方身份仍然有待核實，但保安嘅反應已經成為網民圍剿嘅焦點。