食飯最怕食到「加料」，如果喺碟餸發現有條頭髮，大部分餐廳都會即刻道歉換過碟新嘅。不過，最近英國有間餐廳就遇到離譜事件，有食客投訴食到頭髮，店家即時補鑊，點知事後翻查閉路電視，先發現成件事係一個局，結局更令人嬲到震！

食到頭髮要求換餐兼打包 閉路電視揭驚人真相

事發喺英國一間叫「The Woolpack」嘅餐廳，當晚一個家庭無訂位就入座。食到一半，佢哋就向職員投訴，話個仔食緊嘅芝士通心粉入面有條長頭髮。餐廳二話不說即刻道歉，仲免費幫佢哋換過一份新餐點，廚師甚至表示可以任揀餐牌上任何嘢食。點知呢家人竟然將新餐點打包拎走。事後餐廳職員越諗越唔對路，因為廚房根本無人留咁長嘅頭髮，於是決定翻查CCTV，結果發現驚人一幕！原來係家庭中一名女子，疑似喺自己頭上拔咗條頭髮落碟芝士通心粉度，再攪勻扮係餐廳問題，自編自導自演一場大龍鳳！

事件曝光後網民群起洗版 怒轟一家人行為極可恥

餐廳將閉路電視片段放上社交平台公開事件後，即刻引嚟大批網民洗版式討論，一面倒鬧爆呢家人嘅行為！網民紛紛替餐廳唔抵，怒轟佢哋濫用店家嘅善意，「為咗一餐免費飯，連人格都唔要」、「教壞個仔」、「小店經營已經好困難，仲要遇到呢啲人」。大家狠批呢家人嘅行為極度可恥，唔單止呃飲呃食，仲嚴重打擊良心小店嘅士氣。

呃餐唔夠仲順手牽羊 餐廳慘失3樣嘢決心反擊

你以為呃餐已經係極限？少年你太年輕了！餐廳喺帖文再爆料，指閉路電視仲影到，呢家人臨走前，其中一人竟然將枱面一支番茄醬，偷偷攝入小朋友頂帽入面帶走，另外仲唔見咗一隻雪糕碗同埋一隻茶匙！餐廳大呻，經營小生意已經好艱難，仲要面對呢啲虛假投訴、網上威脅同埋餐具盜竊，損失慘重。店家強調，以後面對呢啲失實指控，絕對唔會再啞忍，決心為自己討回公道！