英國動保L正義感大爆發！闖餐廳搶走2年半龍蝦「放生」老闆心碎揭心寒真相

47歲動保人士直搗餐廳強搶龍蝦過程全曝光

事件發生於去年4月10日，地點是英國多塞特郡一間名為「the Old Fish Market」嘅餐廳。該名47歲動保人士斯馬特（Emma Smart）突然闖入店內，二話不說就將手伸入水族箱，強行抱走一隻活龍蝦。餐廳職員見狀即時上前制止，雙方更在店外發生拉扯，但最終仍被斯馬特成功掙脫，將龍蝦帶到附近港口拋入海中「放生」。斯馬特聲稱自己是為咗拯救即將被食用的海洋生物，但原來佢完全搞錯晒！餐廳老闆庫柏（Anthony Cooper）心碎表示，呢隻名叫「喬治」（George）嘅龍蝦其實係佢嘅寵物，已經喺店內飼養咗約2年半，從來都唔係用嚟賣，而係作為教育用途，畀到訪嘅小朋友認識海洋生物㗎！

法官直斥其非指放生行為極度錯誤

事件最終鬧上法庭，斯馬特承認一項刑事損壞罪。雖然辯護律師指佢係因為過度關注海洋動物福利而一時衝動，但法官完全唔接受呢個講法，更直斥其非！法官明確指出，涉案龍蝦「喬治」根本唔係用嚟食，而係有教育用途，斯馬特依然將佢強行帶走再丟入港口，係非常錯誤嘅行為。法官更一針見血咁話：「這對龍蝦來說絕對不是什麼好事，沒人知道牠能否活下來」，狠狠咁打臉斯馬特自以為是嘅「拯救」行動。

寵物龍蝦生死未卜動保人士被判禁制令

至於大家最關心嘅結局，被錯誤「放生」嘅寵物龍蝦「喬治」至今依然下落不明，生死未卜。而該名動保人士斯馬特，最終被判處8個月有條件釋放，更要遵守為期長達3年嘅限制令！法庭下令禁止佢進入涉事餐廳10米範圍之內，亦都唔可以接觸餐廳職員同顧客。一個自以為正義嘅舉動，最終不但可能害死一條無辜生命，自己更要負上刑責，真係令人不勝唏噓。