打工仔日日做到隻積咁，相信唔少人都幻想過可以盡快「財務自由」，唔使再睇老闆面色做人！最近就有一位女教師，明明有穩定「鐵飯碗」，但就因為壓力太大而萌生裸辭念頭。佢將個人狀況放上網想集思廣益，點知自己坐擁每月$25,000被動收入嘅「超強背景」曝光後，反而引來大批網民勸退，究竟係咩玩法？
事主大呻教書壓力爆煲月薪僅$11000
事主喺社交平台大呻，自己任教三年，雖然老師呢份工喺外人眼中又穩定又安逸，但對佢嚟講已經變成一種煎熬。佢透露近年教育環境改變，唔單止要應付部分「怪獸家長」，仲要面對超長工時，感覺生活完全被學校綁死，壓力大到頂唔順。最令人心酸嘅係，佢付出咁多，月薪都只係得港幣$11,000左右。不過，真正令佢陷入兩難嘅，係佢同時有每月高達港幣$25,000嘅租金被動收入，經濟上完全有能力「劈炮唔撈」，所以先認真考慮係咪應該裸辭，換取更自由嘅生活。
網民意見兩極化撐裸辭定繼續做引發激辯
事件曝光後，帖文即刻被網民洗版，意見更出現嚴重分歧！支持裸辭嘅一派認為，事主嘅被動收入已經遠超薪金，絕對有條件「炒老細魷魚」。有網民留言力撐：「如果呢筆錢係穩定長期收入，裸辭冇問題啦」、「快啲辭職去搵自己真正嘅興趣，會發現個世界好大！」、「收租冇貸款嘅話，直接退休都得啦！」但另一派網民就持相反意見，認為裸辭太衝動，提醒事主：「$25,000而家夠用，但要考慮通脹，一唔做嘢個人好易變懶」、「好唔容易先考到教職，可以試下轉去細啲嘅學校，唔好完全冇嘢做」。
月賺$10萬神人現身說法一句KO事主惹反思
喺兩派網民激烈辯論之際，一位「神人」現身說法，佢嘅留言瞬間令成個討論氣氛逆轉！呢位網民自爆，自己每月被動收入高達港幣$100,000，足足係事主嘅四倍，但依然堅持返工。佢語重心長咁表示：「我覺得點都要有份工，如果唔係，到最後人生會變得毫無目標。」呢句「金石良言」一出，即刻引起大量網民共鳴，唔少人認為工作除咗為錢，更重要係帶來嘅社會聯繫同個人成就感，奉勸事主就算想辭職，都應該三思而後行，唔好為咗一時嘅自由而放棄長遠嘅人生規劃。
